A vicepresidenta cuarta do Goberno e responsable da desescalada, Teresa Ribera, situou este xoves en xullo a volta do turismo estranxeiro a España en condicións de seguridade e advertiu de que unha prematura apertura masiva sería unha "irresponsabilidade" que podería poñer en risco á poboación española.
"Temos que ir con moito coidado sobre como a persoa que vén non corre risco, porque chega a un destino seguro, e ao mesmo tempo non supón un risco para a poboación local. A nosa idea é que poidamos traballar sobre orixes e destinos seguros máis ben pensando no mes de xullo que no de xuño", dixo Ribera.
A ministra explicou que a chegada de turistas estranxeiros "probablemente veña compasada co resto do proceso de desescalada". Ribera subliñou que os rebrotes que se produciron en China, Corea do Sur e Singapur "estiveron asociados á importación de casos" do exterior.
"Iso non o queremos para a nosa poboación. Os datos que son extraordinarios nas illas Canarias, Baleares ou Andalucía ofrécennos seguridade hoxe, cando non hai mobilidade entre provincias, cando non veñen persoas que puidesen estar potencialmente contaxiadas. Se se abre masivamente poderiamos estar a incorrer nunha irresponsabilidade", engadiu.
Ribera asegurou que a UE entende que a do turismo é "unha cuestión importante" e por iso os ministros de Sanidade, Asuntos Exteriores, Turismo e Transporte traballan para "xestionalo con prudencia". Recoñeceu ademais que empeza a haber interese e demanda de turistas estranxeiros de vir a España "unha vez que a situación da pandemia está controlada e empeza a facer bo tempo".
Ribera confía en que o esforzo que están a facer "todos os territorios" se traduza nunha "rapidísima recuperación", aínda que recordou que aínda hai risco de que haxa un rebrote e unha regresión das medidas de alivio do confinamento.
