O ministro do Interior, Fernando Grande-Marlaska, sinalou este luns, ante a posibilidade de que Madrid pida a declaración de zona catastrófica polo temporal Filomena, que o Goberno concretará posibles axudas unha vez que se conteña a actuación de emerxencia e se avalíen os danos causados.
Grande-Marlaska non concretou cal será a postura final do Executivo no caso de que Madrid confirme a súa petición, pero insistiu en que primeiro é preciso ter información detallada e completa dos danos provocados. "Desde o primeiro momento, estamos a avaliar os datos precisos para esas axudas que sexan necesarias cando o momento concreto se materialice, que será cando a situación de urxencia conclúa e a avaliación definitiva poida realizarse", apuntou o ministro do Interior nunha rolda de prensa no Palacio da Moncloa.
Xunto aos titulares de Transportes, José Luis Ábalos, e de Defensa, Margarita Robles, Grande-Marlaska compareceu ao termo da reunión telemática do comité estatal de coordinación presidida polo presidente do Goberno, Pedro Sánchez, para examinar a evolución do temporal en varias comunidades autónomas, entre elas a de Madrid.
Ante a posibilidade de que a cidade de Madrid solicite a declaración de zona catastrófica, Grande-Marlaska recordou que a normativa aprobada en xuño de 2019 sobre protección civil obriga, en primeiro lugar, a recuperar a normalidade e garantir os servizos públicos esenciais antes de habilitar posibles axudas.
"Estamos a avaliar os danos que se irán observando e definindo cando conclúa a situación de urxencia. Isto non terminou. Temos uns días difíciles nos que o sistema nacional de protección civil está en alerta. A avaliación está a facerse", insistiu.
Tamén subliñou a necesidade de que as administracións locais e autonómicas que reclamen medidas extraordinarias acheguen toda a información sobre o impacto ocasionado polo temporal.
