A Fiscalía remitiu un escrito á xuíza de Violencia sobre a Muller 5 de Madrid no que rexeita que se encargue de investigar os feitos ocorridos o pasado día 3, cando Ángel Hernández axudou á súa esposa, María José Carrasco, a suicidarse.
Tras a inhibición dun xulgado de instrución que remitiu os feitos á xuíza de Violencia sobre a Muller, a Fiscalía explica no seu escrito que Ángel Hernández axudou á súa esposa a inxerir unha sustancia para terminar coa súa vida, pero foron uns "feitos cometidos por petición expresa" de María José Carrasco e "dada a enfermidade que padecía".
Para a Fiscalía, o Xulgado número 5 de Violencia sobre a Muller carece de competencia para coñecer o presente asunto porque as dilixencias abertas a raíz do falecemento de María José Carrasco teñen por obxecto a comisión dun delito de cooperación ao suicidio.
O Ministerio Público insiste en que "desde o primeiro momento existía a constancia de que María José Carrasco, afectada dunha grave, dolorosa e incurable enfermidade que a facía totalmente dependente, manifestou repetidamente o seu desexo de morrer dunha forma libre, pública e consciente". Engade que a muller pediu ao seu marido a axuda necesaria que precisaba para levar a cabo o seu desexo de morrer "accedendo o investigado a pór fin a ese sufrimento que arrastraba desde había trinta anos".
Deste xeito "non pode razoablemente sosterse a existencia dese contexto de dominación e de relacións de asimetría e de poder sobre a muller que perfila e define a violencia de xénero", agrega.
A Fiscalía subliña que "Ángel Hernández accedeu á decisión da súa muller, algo totalmente alleo á idea de dominación e de relacións asimétricas". Para o Ministerio Público "quedaron acreditadas desde o inicio do procedemento esas coordenadas radicalmente diferentes ás que fai referencia a xurisprudencia e que o afastan do ámbito e do espírito da violencia de xénero e da competencia dos xulgados de violencia sobre a muller".
Sinala que se trata dunha "cooperación ao suicidio ou, o que é o mesmo, auxilio a un desexo expreso, manifesto e patente da persoa falecida, sen que exista ningunha situación de sometemento por parte da mesma".
A Fiscalía mantén que a conduta de Ángel Hernández non supón unha manifestación de supremacía nin de subordinación da súa muller e recorda que se ocupou persoalmente dos coidados persoais de María José durante o padecemento da súa grave enfermidade ata a súa morte.
Neste sentido o Ministerio Fiscal incide en que a morte de Carrasco supuxo un acto de cooperación a unha decisión libremente pactada e meditada pola propia falecida sen que se dobregara a súa vontade. "Iso sen prexuízo das responsabilidades penais que se poidan derivar pero sen que en ningún caso se trate dun suposto que deba ser incardinado nos actos de violencia de xénero", recalca.
A Fiscalía explica que "aínda entendendo a violencia dun modo amplo como calquera actividade humana máis ou menos agresiva en detrimento dunha persoa e contraria á súa vontade dificilmente tería encaixe nos feitos que se están instruíndo nesta causa". "Considerar estes feitos como violencia contra a muller é contraditorio cos fins perseguidos polo lexislador ademais de mandar unha mensaxe destorcida á sociedade sobre cal é a razón e contido da mesma", conclúe.
