O Tribunal Europeo de Dereitos Humanos (TEDH) condenou este martes a España por privar ao expresidente do Parlamento Vasco Juan María Atutxa de defenderse nunha vista ao ser xulgado polo Tribunal Supremo por non ilegalizar en 2003 ao grupo parlamentario Sozialista Abertzaleak.
A Corte europea outorgou unha indemnización dun euro a cada un dos tres demandantes (ademais de Atutxa, os exmembros da mesa do Parlamento Kontxi Bilbao e Gorka Knörr, tamén condenados, do mesmo xeito que el, polo Supremo) por danos morais como reclamaran, e 600 euros para os tres por gastos e honorarios.
Os xuíces europeos dixeron que se vulnerou o seu dereito a un xuízo xusto, debido a que "as cuestións que debían ser examinadas polo Tribunal Supremo necesitaban a apreciación directa do testemuño dos demandantes".
Na súa resolución, o TEDH considera que tanto Atutxa como os outros dous parlamentarios foron privados do seu dereito a someter a contradición as acusacións que se verquiron contra eles, xa que foron condenados polo alto tribunal sen que os feitos puidesen ser examinados por unha instancia inferior.
Estrasburgo resolveu o recurso de Atutxa, Bilbao e Knorr contra a sentenza do tribunal de garantías que confirmou a condena e destacou as "notables diferenzas" que se dan entre este suposto e o establecido un ano antes polo Supremo na denominada doutrina Botín, que impediu a apertura dun proceso ao banqueiro a instancia exclusiva da acusación popular.
