Con vistas ás próximas eleccións municipais e autonómicas, o Partido Popular, quere pechar antes do 21 de xuño a lista de candidaturas. Os comicios celebraranse en 2015 para aqueles municipios de máis de 1.000 habitantes e comunidades autónomas.
As directrices a seguir perfilaranse nunha escola de verán, durante o mes de xullo. Nelas tomaranse as decisións oportunas en materia de reformas por parte do executivo. O vicesecretario do partido, Carlos Floriano, explicou hoxe en rolda de prensa que a súa filosofía segue en liña da análise por territorios -el mesmo estase reunindo cos presidentes e dirixentes rexionais-, un traballo "moi serio e concienzudo", dixo, centrado en ver "onde está esa bolsa de votos" que puideron ir ao PP e non o fixeron por diversas causas.
O obxectivo deste estudo é o de ver as razóns polas que os tradicionais votantes do partido quedaron en casa ou, en menor medida, optaron por votar a outras formacións e sobre todo traballar para solicitar o máximo apoio posible para os próximos comicios.
Floriano sinalou que a "radiografía" que se está facendo por agora é da situación, aínda que admitiu que haberá que porse a traballar canto antes tamén nos nomes e no que deben ser as liñas xerais do programa electoral. Insistiu en que o que ocupa, e que máis preocupa os populares é ser capaces de trazar un plan que lles permita solicitar o maior número de apoios posibles nas próximas convocatorias electorais. O vicesecretario recordou que, en calquera caso, o seu partido fai este traballo "desde a satisfacción" de gañar as eleccións europeas.
O PP pretende publicar antes de verán a súa lista de candidatos para 2015
