O rapeiro Juan Manuel Montilla, coñecido como El Langui, bloqueou este luns a saída dun autobús da liña 412 despois de que o condutor lle impedise ascender ao transporte de pasaxeiros coa súa cadeira de rodas en Villaverde (Madrid).
Segundo explicou este martes o rapeiro nunha entrevista de radio, viaxara esa mañá coa súa cadeira de rodas na mesma liña de autobús na que pola tarde se lle impediu o acceso.
"Eu levo 8 anos collendo o mesmo bus, o interurbano 412, coa miña cadeira de rodas", explicou o cantante, quen relatou que o condutor lle informou ao impedirlle o acceso que recibira un whashap cunha normativa que indicaba que as cadeiras como a utilizada por El Langui xa non poderían acceder ao autobús.
El Langui declarou na entrevista na emisora Ya Veremos M-80: "Somos centos de persoas os que necesitamos movernos día a día nas nosas cadeiras de rodas", as mesmas, precisou, que o Consorcio de Transportes de Madrid autoriza nos transportes da EMT, proximidade e Metro.
O relato do incidente, no que El Langui, impediu a saída do seu autobús e outros posteriores ata que chegou a Policía, facilitouno o blogueiro Víctor Cruz na súa bitácora.
Segundo ese relato, El Langui intentou acceder este xoves ao autobús público da compañía La Veloz, do grupo Samar, para ir desde Villaverde a San Martín de la Vega, lugar de residencia do cantante, cando o condutor lle negou a entrada ao vehículo.
Ao parecer, segundo recolle Cruz no seu blogue, esta prohibición debeuse, segundo palabras do condutor, a que a súa cadeira de rodas motorizada "non se adaptaba á normativa".
O artista padece unha parálise que o obriga a moverse en cadeira de rodas e, segundo engade Cruz, o condutor do autobús alegou que o vehículo motorizado que utiliza El Langui "non está autorizado a acceder ao transporte público".
En protesta por ese tratamento, El Langui plantouse diante do autobús, impedindo a saída do mesmo, para reclamar o seu "dereito a viaxar en autobús".
Na entrevista de radio, o rapeiro engadiu que a súa cadeira de rodas, eléctrica, é a mesma que subvenciona a Comunidad de Madrid para as persoas con discapacidade, o que supón un contrasenso co feito de que non poida utilizarse nun transporte público que depende desa mesma comunidade.
El Langui bloquea un autobús por segunda vez
O rapeiro e actor protesta así pola negativa dunha compañía a deixar acceder a usuarios en cadeira de rodas