O xuíz acusa de 4 delitos sexuais o ex-profesor dos Maristas de Sants

O xuíz que investiga o ex-profesor da escola Maristas de Sants de Barcelona Joaquín Benítez impútalle catro delitos de agresións ou abusos sexuais a ex-alumnos, ao entender prescritas outras 13 denuncias presentadas, e rexeitou que o centro educativo exerza a acusación particular no caso.

Segundo fontes xudiciais, o titular do xulgado de instrución número 6 de Barcelona, Miguel Ángel Tabarés, citou a declarar de novo como investigado o pederasta confeso para o próximo 28 de abril, tras abrirlle un proceso sumarial no que o acusa de dous delitos de agresión sexual e outros de abusos.

Tal e como expuña a Fiscalía, o xuíz instrutor arquivou 13 das denuncias presentadas contra o pederasta confeso, que o pasado mes de febreiro quedou en liberdade con cargos tras recoñecer ante o xuíz ter abusado de polo menos un discípulo, ao entender que transcorreu o prazo de prescrición previsto pola lei.

En total, o xuíz tivo sobre a mesa 18 casos de presuntos abusos sexuais supostamente cometidos polo ex-profesor de Educación Física por abusos ou agresións sexuais, pero un deles non chegou a investigarse, dado que o ex-alumno decidiu retirar a denuncia.

Ademais de citar como investigado a Benítez, que cando declarou o pasado mes de febreiro foi interrogado só en relación con dúas denuncias presentadas ata ese momento, o xuíz tomará declaración a outras dúas vítimas do ex-profesor, aos que ordenou que examine un forense para determinar as secuelas que poidan arrastrar.

Concretamente, o maxistrado acusa o ex-profesor de Educación Física de agresións sexuais a dous alumnos presuntamente cometidas nos anos 2007 e 2010 —que comportan unha pena de cárcere maior ao existir penetración— e de abusos sexuais a outros dous discípulos entre os anos 2005 e 2009.

Noutro auto, o xuíz instrutor denegou a petición da Fundación Champagnat, propietaria do centro de Maristas de Sants-Les Corts, de presentarse como acusación particular na causa aberta contra Joaquín Benítez, ao que se opoñen as vítimas, que ven posible responsabilidade da escola nos feitos.

De feito, Benítez abandonou a escola de Maristas logo de recoñecer ante a dirección ter abusado de alumnos, o que motivou que a dirección comunicase os feitos á Fiscalía, aínda que o caso acabou arquivándose porque os pais dun menor denunciante desistiron de seguir adiante coa denuncia contra o pederasta.

Pola contra, o maxistrado acordou aceptar que o Concello de Barcelona exerza a acusación popular contra o pederasta confeso.