Rajoy: "Non era posible dialogar con quen só querían falar de referendo"

O expresidente Mariano Rajoy afirmou que o seu Executivo intentou dialogar para solucionar o conflito con Cataluña pero que non "era posible" se o que estaba enfronte só quería falar de liquidar "a soberanía nacional" e admitiu que "nas últimas datas xa era moi difícil falar con Puigdemont".

"Dialogar con alguén que do único que quere dialogar é de porlle data ou discutir os termos de como liquidar a soberanía nacional non era posible ou polo menos non o era para min", recoñeceu Rajoy durante a súa declaración como testemuña ante o Tribunal Supremo.

"Eran plenamente conscientes desde o primeiro día que me reunín con Mas que eu non ía autorizar un referendo"

O entón presidente do Goberno explicou que "nas últimas datas xa era moi difícil falar con Puigdemont", aínda que houbo xente que "puido facelo" e recoñeceu que algunhas persoas o chamaron "por se se podía arranxar". "Aquí pódese arranxar todo, pero non a liquidación da lei e da Constitución española, comigo non conten para isto", manifestou.

Rajoy sinalou que era "evidente que a situación se vía vir" e que todos os dirixentes cataláns "o sabían" porque "non había que ser moi agudo". "Avisamos ata a saciedade de que por ese camiño non iamos a ningunha parte, fomos moi prudentes", afirmou Rajoy, que insistiu en que por parte do seu Goberno se fixo un "esforzo" para conseguir "o apoio de todos" á aplicación do artigo 155 en Cataluña a pesar de que o seu partido, o PP, tiña maioría absoluta no Senado.

"Gústame dialogar, gústame pactar, pero gústanme as regras de xogo"

Ademais, dixo, deuse "a oportunidade de rectificar" a aqueles "que tomaron unha decisión", ao seu xuízo, inadecuada, en referencia a varias cartas que el mesmo enviou a Carles Puigdemont para que explicase se convocara ou non a independencia e no seu caso a revogase.

Rajoy recordou que o seu Goberno aplicou por primeira vez na historia de España o artigo do 155 e fíxoo tendo en conta o "respecto da soberanía e unidade nacional" e o "cumprimento da lei".

 "Pensabamos que o 155 era moito máis operativo e máis xusto, porque o estado de excepción ou de sitio afectan a dereitos individuais"

O galego lamentou "moitísimo" as imaxes de violencia do 1-O pero responsabilizou ao Govern de Carles Puigdemont dos cidadáns e axentes feridos por seguir adiante coa convocatoria do referendo animando á xente a votar e incumprindo a lei.