Dez policías nacionais resultaron feridos na noite deste venres durante a súa intervención para evitar o intento de fuga dun grupo de inmigrantes recluídos no Centro de Internamento de Estranxeiros (CIE) de Aluche, en Madrid, nun incidente no que tamén sufriu lesións un interno.
Segundo informaron a Efe fontes policiais, oito dos axentes feridos fórono de prognostico leve e dous foron evacuados a centros hospitalarios, un deles por unha brecha na cabeza e o outro por unha fractura na man.
De momento descoñécese se algún dos inmigrantes conseguiu fuxirse, mentres que a Policía está a facer o reconto dos internos que hai no centro.
Outras fontes explicaron a Efe que os internos baleiraron no interior das instalacións os extintores e utilizaron como arietes bancos do centro.
Ao parecer, o altercado produciuse logo da cea, no momento en que habitualmente se reparte a medicación aos internos que a precisan, segundo detallaron fontes policiais.
No CIE de Aluche hai actualmente uns 170 inmigrantes internos, dos cales aproximadamente 60 ou 70 son de orixe alxerina, un colectivo que protagonizou os últimos intentos de fuga no centro.
