A Policía Nacional detivo en Pamplona, no marco dunha operación que continúa aberta, a un home como presunto autor dun delito de branqueo de capitais e múltiples delitos de estafa por valor de máis de 70.000 euros cometidos a unhas 125 vítimas de diferentes comunidades autónomas.
Ao home de 36 anos acúsaselle dun delito de estafa continuada, branqueo de capitais e usurpación de identidade e a súa identificación foi posible grazas ao labor desenvolvido durante máis de dous anos polos axentes dentro da Operación Return, informa a Policía nun comunicado.
Os investigadores analizaron máis de vinte contas bancarias de diferentes entidades e fóronas relacionando coas 125 denuncias detectadas en Navarra, Galicia, Madrid, Andalucía, A Rioxa, Castela-A Mancha, Castela e León, Murcia, Valencia, Aragón, Cantabria, País Vasco e Canarias.
En todas esas denuncias, que sumaban un total de 70.379 euros defraudados, coincidía o modus operandi co utilizado polo presunto autor.
Así, segundo relata, o presunto autor ofertaba os seus produtos fraudulentos a través de anuncios en múltiples portais online. Ofrecía tanto coches, motos, consolas ou móbiles como alugueres de habitacións ou de pisos en diferentes cidades do territorio español cuns prezos "irrisorios en comparación aos que marca o mercado e con fotografías de vivendas reformadas e en bo estado".
Unha vez que os compradores ingresaban o diñeiro, descubrían que os obxectos adquiridos nunca chegaban e que os pisos anunciados eran falsos. A investigación desvelou que, en moitas ocasións, os prexudicados buscaban desesperadamente un lugar onde poder residir de xeito urxente.
Durante as datas de confinamento estrito derivado do estado de alarma en 2020 como consecuencia da pandemia, as vítimas tiñan que buscar lugares alternativos nos que aloxarse e déronse casos como o duns estudantes de Andalucía que tras realizar un pago duns 3.000 euros para alugar unha vivenda en Madrid onde ían cursar estudos, desprazáronse ata a capital, e quedaron na rúa ao decatarse de que foran vítimas dunha estafa.
Os investigadores comprobaron que o detido era titular de 25 contas bancarias en distintas entidades e de 150 liñas telefónicas diferentes e, ademais, valíase de persoas ás que estafara previamente para utilizar o seu DNI con novas vítimas, coa finalidade de achegar visos de autenticidade á conversación e protexer tamén a súa propia identidade.
Isto, segundo a Policía, supuña non só unha maior complexidade para chegar ao momento de inicio das estafas, senón que xeraba prexuízos ás persoas ás que usurpaba a identidade xa que recibían chamadas telefónicas doutras vítimas, así como citacións xudiciais ou policiais para comparecer por feitos nos que non tiñan nada que ver.
A investigación desvelou tamén que o presunto autor fora detido en 2014 por un delito continuado de estafa sobre 148 persoas ás que chego a defraudar 37.104 euros.
Tras a súa detención unha vez identificado e localizado polos investigadores, e co preceptivo mandamento xudicial, procedeuse a un rexistro domiciliario da súa vivenda no que se incautaron cartóns asociados ás contas bancarias investigadas, así como unha serie de documentos no que aparecían anotacións de transaccións bancarias, múltiples números de teléfonos e números de DNI e consolas e xogos que utilizaba para pór os anuncios.
O detido foi posto a disposición da autoridade xudicial xunto coas dilixencias de investigación.
