A Policía Nacional destapou unha fraude á Seguridade Social de máis de 27 millóns de euros no marco de varias actuacións desenvolvidas en 17 provincias españolas, Lugo entre elas, entre maio e agosto que deron como resultado 33 detidos e 40 investigados, informa este Corpo.
Os investigadores revisaron 22 expedientes nos que descubriron delitos como fraude de cotizacións e prestacións, falsidade documental, estafa, insolvencia punible, branqueo de capitais e grupo organizado sendo os responsables principalmente empresarios pero tamén os seus homes de palla, algúns deles familiares.
Trátase da Operación Pandora levada a cabo en colaboración coa Tesourería Xeral da Seguridade Social en Alacante, Baleares, Barcelona, Cáceres, Cádiz, Córdoba, Xirona, Guipúzcoa, Granada, Huelva, As Palmas, Lugo, Madrid, Málaga, Toledo, Valladolid e Zamora.
Para eludir o pago de cantidades debidas e frustrar as aspiracións de cobro da Seguridade Social os detidos e demais investigados creaban armazóns empresariais cos que ocultaban bens a través de sucesivas transmisións.
Así mesmo rompían precintos de bens embargados, formulaban denuncias falsas relacionadas con roubos dos mesmos e vendíanos, e ademais falsificaban certificados de estar á corrente das obrigacións coa Seguridade Social. Así podían continuar coa actividade laboral mediante subcontratacións e acceder ao cobro de prestacións públicas ou obter bonificacións na cota de autónomo ou nas cotizacións de traballadores.
Un dos casos máis destacados para a Policía foi o descuberto en Maspalomas (As Palmas), onde dous cidadáns españois suplantaron a personalidade de administradores de dúas empresas de asesoramento online e de arquitectura e enxeñería, con sede na illa de Gran Canaria.
Atribuíronse poderes cos que non contaban e desta forma obtiveron autorizacións para tramitar a alta de traballadores ficticios co único fin de obter beneficios económicos e sociais.
Os supostos traballadores obtiveron indebidamente prestacións por desemprego, períodos de cotización non baseados en actividade laboral real e acceso indebido ao sistema sanitario público. Outro caso rechamante para a Policía foi o descuberto na provincia de Huelva, onde unha sociedade limitada unipersoal foi constituída en 1999 para a explotación de buques de pesca e desde 2012 converteuse en debedor sistemático á Seguridade Social ao non pagar as cotizacións dos seus mariñeiros.
En 2014 os donos simularon a venda da compañía a unha persoa insolvente que usaron como home de palla, pondo a salvo con esta manobra a propiedade e o domicilio familiar ao seu nome na localidade onubense de Lepe.
O verdadeiro dono da compra do barco resultou ser o líder dunha importante organización criminal dedicada ao tráfico de drogas que fixo figurar á fronte da empresa a homes de palla que realmente eran persoas insolvente e toxicómanos. Os propietarios contrataron pescadores para ocultar a introdución de importantes cantidades de haxix e cocaína en España.
Tamén destaca un terceiro caso en Zamora, onde a Policía desarticulou un grupo do sector da madeira e a silvicultura, un de cuxos detidos defraudou durante 37 anos máis dun millón de euros á Seguridade Social.
Igualmente en Alacante descubriuse a falsificación por parte de tres cidadáns marroquís de formularios para a obtención de prestacións para sufragar a manutención en Marrocos dos fillos a cargo de traballadores marroquís desprazados a España en virtude dun convenio entre ambos os países.
