Desactivada a alerta por calima en Canarias, que pasa a situación de prealerta

O episodio que sofren as illas, o máis intenso deste século, está a obstaculizar a intervención dos medios aéreos para sufocar os incendios en Gran Canaria e Tenerife
Intensa calima en Tenerife. EFE
photo_camera Intensa calima en Tenerife. EFE

O episodio de calima que está a dificultar a extinción dos incendios rexistrados en Gran Canaria e Tenerife é o máis intenso deste século, e recorda ao que se produciu en Reis de 2002, cando a gran cantidade do po en suspensión e a baixa visibilidade obrigou a cancelar os voos en Lanzarote e Forteventura. Segundo o delegado territorial da Axencia Estatal de Meteoroloxía (Aemet), Jesús Agüera, un fenómeno como este non se producía desde hai máis de 30 ou 40 anos.

Este luns o Goberno de Canarias deu por concluída a situación de alerta por calimas no arquipélago canario, que deste xeito pasa a prealerta desde as 15.52 horas. A decisión adoptouna a Dirección Xeral de Seguridade e Urxencias en base ás predicións da Aemet.

A previsión é que a concentración de calima sexa variable e con tendencia a remitir a partir do mércores próximo.

O tempo impide operar aos helicópteros no incendio de Gran Canaria

En Canarias este tipo de fenómenos atmosféricos, xerados por ventos que transportan partículas de auga ou po en suspensión, danse con relativa frecuencia, dada a proximidade do arquipélago á costa africana. As calimas son mais frecuentes no inverno, en especial a finais de decembro e nas primeiras semanas de xaneiro e febreiro.

SEN CONTROLAR. Neste contexto, os medios aéreos non puideron intervir aínda para atallar o lume que afecta a unha parte da Reserva Natural Integral de Inagua en Gran Canaria, que comezou na tarde do pasado sábado na zona de Taxarche, no noroeste da illa, e xa afectou a unhas 1.000 hectáreas e está sen controlar.

Comentarios