Darias asegura que "non ha lugar" a manifestacións o 8-M nunha pandemia

Carolina Darias. JUAJO MARTÍN (EFE)
photo_camera Carolina Darias, este mércores. JUAJO MARTÍN (Efe)

A ministra de Sanidade, Carolina Darias, asegurou este mércores que "non ha lugar" a manifestacións polo Día Internacional da Muller, o 8 de marzo, nunha situación de pandemia e fixo un chamamento á "responsabilidade". 

Tras o Consello Interterritorial de Saúde, ante unha pregunta da prensa sobre as celebracións previstas para este día e sobre se ela acudiría —como fixo o ano pasado xunto a outros membros do Goberno—, apuntou que "a situación epidemiolóxica" actual "non permitiría levar a cabo" as manifestacións das que se está falando nos medios. "Por coherencia dunha chamada á responsabilidade que realicei, posto que aínda estamos en situación de risco extremo, non ha lugar", dixo ante a pregunta. 

Darias fixo estas declaracións o mesmo día no que o delegado de Goberno en Madrid, José Manuel Franco, anunciou que se prohibirán as marchas de máis de 500 persoas na capital o 8-M.

IGUALDADE. Mentres, a secretaria de Estado de Igualdade, Noelia Vera, asegurou este martes que o ministerio está á espera de información sobre as intencións das organizadoras do 8-M para este ano e sinalou que as "acompañarán" nas iniciativas que decidan, atendendo "ás normas de seguridade" que poñan pola pandemia. Así, explicou que van esperar a ter "información delas" que "son as protagonistas" para "atender ás normas de seguridade que elas poñan" e "acompañalas, coma sempre"

A Comisión 8M anunciou o pasado sábado, en declaracións a Europa Press, que quere volver "tomar as rúas" en 2021, aínda que a súa intención é que as mobilizacións se realicen con medidas de seguridade e descentralizando algúns actos para evitar as concentracións numerosas. 

A conmemoración chega este ano en plena pandemia e logo das críticas que suscitou a súa celebración o ano pasado. A oposición sinalou a manifestación do 8-M para criticar a xestión do Goberno nos inicios da crise sanitaria e como foco de contaxio, cando a ministra de Igualdade, Irene Montero, ou Carolina Darias deron positivo por coronavirus días despois de participar. 

En 2020 tamén estiveron na manifestación representantes de partidos políticos, como PP e Ciudadanos, que en 2021 poden volver unirse, xa que a convocatoria a estes actos realízase a través de asembleas abertas e todo aquel que queira unirse faino libremente. 

Comentarios