Hixiene estrita e distancia de seguridade son os eixos fundamentais da guía de boas prácticas que publicou o Goberno facilitar a volta ao traballo coa continuación das actividades non esenciais a próxima semana.
A guía recolle medidas tanto para os traballadores como para as empresas. Estas son as principais recomendacións:
Os que non deben acudir
- A primeira e máis esencial medida é que se se presentan síntomas ou se tivo contacto estreito con persoas afectadas polo virus, non se acuda ao centro de traballo ata confirmar que non hai risco, para o que se debe contactar co teléfono Covid de cada comunidade autónoma e consultar o decálogo de actuación de Sanidade.
- Tampouco deben acudir as persoas máis vulnerables por idade, por estar embarazadas ou por padecer afeccións polas que un médico estimase necesario o illamento. Nese caso, consideraríase a efectos laborais unha situación similar a un accidente de traballo para a prestación económica de incapacidade temporal.
Desprazamento ao traballo
- Recoméndase usar medios de transporte que non supoñan a agrupación con máis persoas.
- En caso de elixir un turismo ou un VTC, extremar as medidas de limpeza e evitar máis dunha persoa por fila de asentos. En autobús, metro ou tren débese gardar a distancia interpersoal de dous metros e usar máscara hixiénica, non médica.
No centro de traballo
- A empresa debe planificar tarefas, entradas e saídas de modo que se garanta en todo momento a distancia de dous metros entre os traballadores.
- Evitar aglomeracións en zonas comúns. A reincorporación á normalidade de actividades con risco de aglomeración debe producirse en último lugar.
- Se o espazo de traballo non permite manter a distancia interpersoal nas quendas ordinarias, estes deben graduarse na medida do posible. Non é imprescindible usar a máscara durante a xornada laboral se o tipo de traballo non o require e mantense a distancia.
Recomendacións á empresa
- O persoal debe estar informado das recomendacións sanitarias e dispoñer de produtos de hixiene necesarios: xabón, solución hidroalcohólica e panos dun uso. Tarefas de limpeza reforzada diarias con produtos autorizados por Sanidade, sobre todo as superficies que se tocan máis, como pomos e fiestras así como aparellos de uso habitual dos traballadores.
- En cada cambio de quenda é necesario limpar a área de traballo. Contar con aprovisionamento suficiente de material de protección, especialmente luvas e máscaras. Minimizar o risco a persoas sensibles: maiores de 65, embarazadas e enfermos cardiovasculares, diabéticos, pulmonares crónicos, de cancro e inmunodepresión.
- Facilitar o teletraballo e reunións por videoconferencia. Ventilación periódica das instalacións polo menos de forma diaria e por espazo de cinco minutos. Reforzar a limpeza dos filtros de aire e ventilación dos sistemas de climatización.
Recomendacións aos traballadores
- Evitar saúdos próximos e o uso compartido de equipos. Se é necesario compartilos, desinfectalos antes de usalos se é posible. E se non o é, lavarse as mans inmediatamente despois do seu uso. Non tocarse ollos, nariz e boca e lavarse frecuentemente as mans con auga e xabón durante polo menos 40 segundos ou cunha solución hidroalcohólica. Sobre todo, lavarse logo de toser, estornudar ou tocar superficies potencialmente contaminadas.
- En caso de toser ou estornudar, cubrir nariz e boca coa parte interna do cóbado ou un pano, e tirar este a unha papeleira con peche.
- O persoal de limpeza debe realizar unha completa hixiene de mans ao finalizar o seu traballo de polo menos 60-90 segundos e os seus uniformes deben ser embolsados, pechados e enviados ao seu punto de limpeza habitual e lavados a unha temperatura de entre 60 e 90 graos.
A empresa debe facilitar equipos de protección individual cando os riscos non poden evitarse ou limitarse de forma colectiva. Eses equipos deben ser adecuados ás actividades e traballos a realizar.
Xestión de residuos
Farase do modo habitual respectando os protocolos de separación de residuos. Máscaras e luvas deben depositarse na fracción "resto".
Os panos dun uso tiraranse preferentemente en papeleiras con tapa e pedal. Se un traballador presenta síntomas, illar o colector onde deposite os seus residuos; extraer a bolsa, colocala noutra e depositala no colector "resto".