A exministra Carmen Chacón afirmou hoxe que apoiará o candidato a secretario xeral do PSOE que poña data a unhas eleccións primarias participativas e abertas, ás que se presentará por ser a solución máis democrática e a vía para "reconectar" o pulso do partido cos cidadáns.
Chacón criticou en varias entrevistas radiofónicas os vaivéns do aínda secretario xeral, Alfredo Pérez Rubalcaba, e o espectáculo "moi pouco edificante" dado a semana pasada, cuxo último golpe "insólito" foi a dimisión en bloque de 25 membros da Executiva do PSOE de Castela e León, con dous bandos claramente enfrontados.
Asegurou que o seu único interese é "empuxar" para que o PSOE dea un paso máis no sistema democrático de partidos, como fixeron xa noutros países, e denunciou que, tras dous anos e medio, o partido non cambiou "e a xente está cambiado de partido".
Chacón insistiu en que o PSOE recibiu o 25M unha mensaxe moi dura coa súa maior derrota electoral, que achaca a que a dirección pensaba que co desgaste do Goberno os votos volverían e sinalou que o problema "o temos na rúa, témolo fóra". "Cortóusenos o cordón umbilical que nos unía coa xente", lamentou.
Nese sentido, asegurou que o seu compromiso é "moi firme" para que se dea voz aos cidadáns cunhas primarias que, recalcou, xa foron acordadas por distintos órganos do partido e explicou que se trata de que todos os progresistas axuden a elixir a mellor candidatura.
