O cárcere de Lledoners concedeu senllos permisos de 48 horas ao expresidente da ANC Jordi Sànchez e ao líder de Òmnium Cultural, Jordi Cuixart, para saír de prisión, unha vez cumpriron a cuarta parte da condena que se lles impuxo polo procés.
Segundo informaron fontes do Departamento de Xustiza, a xunta de tratamento de Lledoners, onde están os Jordis, acordou este martes concederlles eses primeiros permisos ordinarios, de 48 horas, que agora deberán ser ratificados polo Servizo de Clasificación da Secretaría de Medidas Penais da Generalitat.
Cuixart e Jordi Sànchez, que este martes cumpriron en prisión un cuarto da condena de nove anos que lles impuxo o Tribunal Supremo por sedición, solicitaron ao centro penal poder gozar xa dun permiso para saír do cárcere. Ao atoparse en segundo grao penal, os Jordis terían dereito a 36 permisos de saída ordinarios ao ano e, sempre que sexan de ata dous días de duración, non precisan do aval do xulgado de vixilancia penal.
