Os exministros de Emprego e Fomento Fátima Báñez e Íñigo de la Serna manifestaron este mércores o seu apoio á candidatura da exvicepresidenta do Goberno Soraya Sáenz de Santamaría para liderar o PP: "Eu estou con Sáenz de Santamaría". Báñez sempre formou parte da facción do PP denominada como Os Sorayos, na que se atopan outros nomes como Cristóbal Montoro, Álvaro Nadal ou Íñigo de la Serna. Serían, en certo xeito, a antítese do chamado G-8, afín a Cospedal e do que forman parte Juan Ignacio Zoido, Rafael Catalá ou Isabel Tejerina, entre outros.
Nos corredores do Congreso, Báñez dixo que lle parece "moi ben" que haxa varios candidatos e que haxa debate interno" nesta etapa de renovación do partido e mostrouse convencida de que "entre todos buscaremos ao mellor candidato e seguiremos cun proxecto común de todos e integrador.
Outros exmembros do Goberno, como o que fora titular de Xustiza Rafael Catalá, preferiron non decantarse polo momento por ningunha candidatura.
Para Catalá, "todos" os candidatos que se presentaron "son moi bos políticos", polo que cualificou de magnifica "noticia" os seis anuncios de candidaturas que houbo ata o momento.
Tras sinalar que os populares teñen "tres semanas por diante para que (os candidatos) fagan a campaña e para poder elixir", destacou que todos os que ouviu ata o momento queren "apostar por un partido forte, vinculado coa sociedade española".
Pola súa banda, De la Serna descartouse como aspirante: "Creo que non estou preparado para ese reto", dixo antes de avalar publicamente á exvicepresidenta.
