Cinco persoas morreron, ata o momento, polo paso da borrasca Gloria pola península, que está a provocar cortes en decenas de estradas e peches de aeroportos e colexios polas nevadas, a mala mar e os fortes refachos de vento. O último falecido foi un home de 55 anos, cuxo cadáver foi atopado nunha zona próxima a un centro comercial de Carcaixent (Valencia). Segundo informaron fontes da Garda Civil, o corpo sen vida é o dun home de nacionalidade ucraína de 55 anos. Investíganse as causas do deceso, e posto que o corpo non mostra síntomas de violencia, crese que puido perecer de frío debido ás condicións climáticas.
Tamén se investiga o achado doutro cadáver en Tavernes da Valldigna, aínda que, debido ao seu estado de descomposición, crese que a causa desa morte pode ser diferente das consecuencias do temporal.
A primeira vítima mortal de Gloria foi un home de 44 anos. O home perdeu a vida o domingo pola mañá no municipio de Aller, nas inmediacións da estación invernal de San Isidro (León), tras resultar atropelado por un vehículo. No momento do impacto, o falecido estaba a pór as cadeas para circular sobre a neve e proseguir viaxe.
Pola tarde, outro home, de 63 anos e veciño de Madrid, morreu en Pedro Bernardo (Ávila) pola caída dunha tella da súa vivenda a causa do vento. O feito produciuse no terreo situado xunto á vivenda da súa propiedade, onde uns amigos o atoparon tras o aviso dado pola esposa do falecido, que non se atopaba na localidade, ao ver que non lle collía o teléfono.
Durante a madrugada, unha muller de 54 anos faleceu na localidade valenciana de Gandía como consecuencia dunha hipotermia. Trátase dunha persoa sen fogar que vivía, xunto a un home tamén indixente, na contorna do parque de L'Estació.
Tamén na Comunidade Valenciana, un home duns 70 anos morreu en Moixent (Valencia), segundo confirmaron fontes da Conselleria de Sanidade, que apuntaron que haberá que esperar a que se practique a autopsia para determinar as causas da morte.
Sobre as nove da mañá deste luns recibiuse no servizo 112 de Urxencias da Generalitat o aviso de que había unha persoa esborrallada nunha zona á que resultaba difícil o acceso pola climatoloxía adversa que sofre estes días a comunidade. Por esta razón, a Garda Civil acompañou o persoal sanitario desprazado ata o lugar. O home foi trasladado ao centro de saúde pero non se puido facer nada por salvarlle a vida. O falecido tiña aproximadamente 70 anos e a autopsia aclarará as circunstancias do falecemento.
