A Consellería de Saúde do Principado pediu aos mozos de entre 15 e 25 anos de Avilés, Castrillón, Corvera, Carreño, Gozón e Xixón unha corentena preventiva na que limiten de xeito moi estrito os contactos e saídas dos seus domicilios para frear a trasmisión do novo coronavirus. Ademais, solicitou dese sector poboacional unha vixilancia activa do seu estado de saúde e das persoas coas que convivan, especialmente se son maiores ou con enfermidades crónicas.
As autoridades sanitarias instan tamén ás familias deses municipios con mozos nesas idades a que vixíen o seu estado de saúde e, ante a aparición de síntomas compatibles coa covid-19 se illen, chamen ao centro de saúde ou ao teléfono 984 100 400. A Dirección Xeral de Saúde Pública estende tamén esta recomendación a persoas doutros grupos de idade que teñan situacións de alto risco.
Ademais, está a estudarse a relación entre un brote familiar con casos de cepa británica e outro, con trece casos, detectado no alumnado de 2º de Bacharelato do Colexio Paula Frassinetti de Avilés, onde se está realizando un cribado.
Así mesmo, analízase a posible presenza de casos que comparten esta cadea de trasmisión co brote detectado no Sporting de Xixón -nove positivos no primeiro equipo e a filial do club e un auxiliar- e que xerara ata este sábado 34 casos de covid-19 confirmados e o seguimento de 120 contactos estreitos.
Asturias pide unha corentena preventiva aos mozos de seis municipios
A Consellería de Saúde do Principado solicitou unha vixilancia activa do seu estado de saúde e das persoas coas que convivan
