A Asociación Católica de Propagandistas (ACdP) colocou a mensaxe Rezar fronte a unha clínica abortista está xenial en máis de 260 marquesiñas de 33 cidades españolas para oporse ás penas de cárcere para os grupos provida que acoden ás portas das clínicas especializadas en abortos.
Trátase da primeira acción de Cancelados, unha nova acción da Asociación Católica de Propagandistas que busca "combater a corrección política dando voz ás posicións silenciadas polo pensamento único", segundo explica nun comunicado.
En total, son 260 paneis instalados en rúas e paradas de metro cos que a ACdP quere "alzar a voz" contra as próximas reformas da Lei do Aborto e do Código Penal. En concreto, esta última prevé ata un ano de cárcere para quen "acose" ás mulleres que van abortar. Aínda que, a ACdP defende que os grupos provida o que fan é "rezar pacificamente" diante destas clínicas.
Os paneis colocados pola asociación sinalan que "en España practícanse máis de 99.000 abortos cada ano", e que "o delito dos que rezan fronte aos abortorios é querer salvar algunha destas vidas".
A mensaxe vai acompañado –vía código QR– do testemuño do doutor Jesús Poveda, un dos principais promotores do movemento provida en España, que foi detido "máis de 20 veces" polas súas "sentadas e operacións de rescate", segundo precisa a ACdP.
