A demanda que presentou a Organización de Consumidores e Usuarios (OCU) contra Facebook por non informar nin solicitar autorización aos seus usuarios para utilizar os seus datos foi admitida a trámite, informou esta organización nun comunicado, no que se felicita por este "paso na defensa dos dereitos".
Segundo a OCU, o xulgado do mercantil número 5 de Madrid admitiu esta demanda, presentada o pasado mes de outubro, e pola que se pide unha indemnización de 200 euros para cada un dos usuarios da rede social en España.
Esta foi unha das accións levadas a cabo a raíz do escándalo de Cambridge Analytica (consultora que pechou tras ser acusada de acceder a información de 87 millóns de usuarios con fins políticos) polas organizacións do grupo Euroconsumers de España (OCU), Portugal (Deco-Proteste), Italia (Altroconsumo) e Bélxica (Test-Achats) en nome dos máis dun millón e medio de consumidores que representan.
No entanto, a demanda non fai referencia a ningún destes escándalos, senón ao modelo de negocio da compañía, baseado na recompilación, utilización e monetización dos datos dos usuarios.
A xuízo da OCU, a rede social non solicita a autorización expresa nin informa os usuarios sobre a utilización dos seus datos, facendo un uso abusivo das súas condicións de contratación.
"A admisión da demanda supón un paso máis na defensa dos dereitos dos usuarios de Facebook", asegura a organización de consumidores no comunicado, no que recordan que os avances da demanda pódense seguir na www.misdatossonmios.org