Vodafone e Ono propoñen despedir a 1.300 persoas, o 21,6% do persoal

Vodafone España e Vodafone Ono comunicaron aos representantes dos traballadores a apertura de senllos procedementos de despedimento colectivo que afectarán a un máximo de 1.300 persoas, o 21,6% do persoal total que suman as dúas compañías (6.000 traballadores). O 40% dos despedimentos corresponderán a Vodafone e o 60% a Ono, explicaron este martes a Efe fontes da operadora.

O anuncio do procedemento de despedimento colectivo chega un ano despois de que Vodafone pechase a compra de Ono por 7.200 millóns de euros e de que xa se reestruturara a cúpula directiva. Vodafone xustifica os despedimentos nas redundancias xeradas pola integración de ambas as operadoras, así como na caída dos ingresos e do resultado de explotación (ebitda) que sufriron nos últimos anos.

Neses anos, engade, leváronse a cabo fortes investimentos en redes de nova xeración, o que esixe maiores niveis de eficiencia. "O axuste de persoal é un paso necesario dentro do plan de integración e forma parte das iniciativas abordadas para lograr que a organización resultante sexa eficiente e competitiva", explica Vodafone nun comunicado.

O período de consultas iniciarase o 1 de setembro e prolongarase durante un mes, no que se fixarán as condicións, os criterios de aplicación e o calendario de execución. Vodafone destaca que as iniciativas deseñadas para gañar en competitividade están estreitamente relacionadas cos proxectos orientados a incrementar a eficiencia e reducir custos.

Entre estes, inclúense o uso da rede de fibra de Ono na transmisión da rede móbil de Vodafone, a migración dos clientes de móbil de Ono á rede de Vodafone, a optimización da canle de distribución, reducir os custos operativos, unha maior eficiencia dos call center e a integración dos sistemas de ambas as operadoras.

No marco destas iniciativas, "o axuste de emprego é unha medida necesaria para dimensionar a nova compañía de forma adecuada e poder competir con éxito nunha contorna moi esixente", afirma Vodafone. Tanto Vodafone como Ono son "moi sensibles ao impacto desta medida" e abordarán a negociación "coa forte determinación de alcanzar coa representación social o mellor acordo posible tanto para os empregados como para ambas as compañías", engade o comunicado.