O secretario xeral do sindicato Unións Agrarias (UU AA), Roberto García, precisou que as organizacións de produtores de leite están nestes momentos en plena negociación coa industria láctea para renovar os contratos cos gandeiros e, polo menos de momento, a tendencia xeneralizada pasa "por repetir o que xa había", con prezos moi similares aos da pasada campaña.
En declaracións a Efe, Roberto García, precisou que a negociación na que está inmersa a organización de produtores Ulega con catro grandes industrias lácteas que operan en Galicia non contempla unha baixada no prezo do leite en orixe, pero tampouco unha subida, porque os valores de compras móvense en cifras moi parecidas ás da pasada campaña.
Preocupa, nese sentido, precisou García, "que a industria se negue, a pesar de que é obrigatorio por lei", a introducir neses contratos unha eventual subida dos custos de produción, algo que temen os gandeiros galegos.
"Xa houbo un simulacro", recordou García, no que se refire á subida das forraxes e os produtores de leite temen que esa subida se poida materializar "no próximo trimestre".
Por outra banda, o portavoz sindical lamentou que o "plan lácteo anunciado aos catro ventos" polo "presidente da Xunta de Galicia e o conselleiro de Medio Rural" sexa de momento "un produto de consumo mediático", sen "ningún efecto práctico para o sector".
Nese sentido, recordou que a comunidade autónoma "segue sen ter un índice de custos de produción" e aínda está lonxe "o obxectivo de transformar aquí todo o leite producido en Galicia".
Tampouco se acabou co diferencial de prezo que existe" en canto á venda de leite en orixe en relación "con outras comunidades autónomas", cuxos gandeiros reciben un prezo maior polo froito do seu traballo.
