Repsol avanza na produción de diésel renovable a partir de residuos na súa refinería da Coruña cunha aposta en grao sumo innovadora: dar unha segunda vida ao aceite de cociña usado para fabricar biocombustible.
A compañía xa procesou 500 toneladas de aceite de fritura de orixe nacional como materia prima para obter hidrobiodiésel, un gasoil máis 'verde' que pode usarse directamente nos motores. Trátase do primeiro lote desta tipoloxía de combustible limpo que a compañía fabrica no centro industrial emprazado entre Arteixo e a cidade herculina mesturando aceite que xa pasou pola tixola ou a freidora con aceite vexetal e outros compoñentes. Todo iso procésase nunha unidade desulfuradora para transformalo en hidrobiodiésel.
Repsol destaca que con este fito dáse un paso máis na descarbonización dos combustibles para o transporte por estrada aproveitando residuos que se xeran en España. A fabricación e uso en automóbiles deste biocombustible obtido a partir de aceite de fritura permite reducir ata nun 90% as emisións de CO2 respecto das dun gasóleo mineral. Ademais, en sectores como o dos vehículos pesados ou a aviación, non electrificables na actualidade, os combustibles limpos seguirán sendo durante os próximos anos "a opción máis rápida e eficiente en relación ao custo" para reducir as "emisións no transporte.
A refinería coruñesa xa está asentada na produción doutros combustibles con baixa pegada de carbono. No proceso de biogasolinas utiliza bioetanol e na fabricación de hibrobiodiésel emprégase como materia prima aceite vexetal. Noutros produtos tamén se incorpora éster metílico de ácido graso. Repsol aspira a alcanzar o obxectivo de cero emisións netas neste complexo en 2050.
