A saída ao mercado das novas furgonetas da fábrica do Grupo PSA en Vigo (coñecidas como o proxecto K9) terá lugar despois do verán, segundo confirmou este martes a dirección da factoría. O director do centro e do Polo Industrial Ibérico, Frédéric Puech, sinalou que o proceso segue o "camiño estándar" dos lanzamentos, e que, a partir do mes de xuño, aumentarase a cadencia de produción. Así, a previsión é que os novos modelos estean no mercado logo de verán.
Segundo incidiu, con esa previsión, a planta de Balaídos alcanzará o seu máximo potencial de produción. Así mesmo, recordou que as novas furgonetas sairán ao mercado para particulares e como vehículos comerciais, aínda que non precisou cales se comercializarán primeiro ou se sairán de forma simultánea.
Puech fixo estas manifestacións tras acompañar ao alcalde de Vigo, Abel Caballero, nunha visita á factoría, para mostrarlle a transformación da fábrica con motivo da chegada dos novos modelos. O rexedor, quen expresou o seu desexo de que "unha das primeiras K9 sexa para o Concello", eloxiou a "capacidade" de adaptación da fábrica do Grupo PSA en Vigo, e proclamou que o proxecto da automobilística "vai garantir o futuro" da empresa na cidade, e "unha parte importantísima do futuro industrial" da comarca.
"Acabamos de visualizar un proxecto de éxito", incidiu, e celebrou que a planta de Balaídos poida garantir "emprego para os próximos dez anos".
