Os prezos da terra agraria soben entre un 30 e un 60% en seis anos

A terra agraria revalorízase en Galicia. Os propietarios de terreos no monte que decidan vendelos poden obter prezos un 60% superiores aos de 2013, cando a cotización media deste tipo de superficie marcou o seu nivel máis baixo da última década. No caso das leiras para actividade agrícola, acumulan unha subida do 30% en seis anos. Así se desprende dun informe que elabora o Observatorio Galego de Mobilidade de Terras, que analiza a situación do mercado entre 2008 e 2019.

Nese último exercicio, o metro cadrado de superficie agraria útil (SAU) –un concepto que engloba as terras labradas e para pastos– pagábase a 1,79 euros de media na comunidade tras un tímido aumento con respecto a 2018. Os que mostran un ascenso máis claro son os terreos de monte, que cotizaban a 0,83 euros o metro cadrado, o importe máis alto de toda a serie histórica de datos, que arrinca en 2008. A Xunta considera que a evolución á alza dos prezos da terra consolida "ou potencial do medio rural".

Aínda que o número de explotacións gandeiras tende a descender, as que seguen adiante son cada vez de maior tamaño, producen máis e necesitan terra para depender o mínimo posible da alimentación externa. En canto ao monte, a madeira segue sendo unha importante fonte de ingresos para os propietarios e hai quen ve as plantacións como unha especie de plan de pensións.

As cotizacións máis altas obsérvanse na contorna de grandes cidades, áreas costeiras e en zonas de produción vitivinícola

As provincias de Pontevedra e Ourense mostran, polo xeral, maiores encarecementos da terra agraria nos últimos anos. As cotizacións en Pontevedra (2,24 euros por metro cadrado de media no período de 2017 a 2019), as máis altas de Galicia, case duplican ás de A Coruña (1,16 euros), e as de Ourense (1,4 euros por metro cadrado) ás de Lugo (0,73 euros). En calquera caso, os prezos e a súa evolución poden variar considerablemente dun punto da comunidade a outro. De feito, especialmente en municipios do eixo atlántico apréciase unha lixeira baixada na SAU e, en menor medida, dos terreos forestais. Con todo, ese fenómeno coexiste con subidas en concellos veciños do litoral, segundo o informe.

Os prezos máis altos dos terreos rústicos obsérvanse na contorna de grandes cidades, en áreas costeiras ou en zonas vitivinícolas. Na provincia, as comarcas coas cotizacións máis elevadas son as de Lugo, Chantada e as mariñanas, se ben o metro cadrado apenas supera o euro de media no mellor dos casos.