O parou baixou en Galicia en 1.600 persoas entre abril e xuño deste ano, o que supón un descenso do 1,14% respecto ao trimestre anterior, quedándose o número de desempregados nos 139.400 persoas, segundo datos da Enquisa de Poboación Activa (EPA) correspondente ao segundo trimestre publicada este xoves polo Instituto Nacional de Estadística (INE).
Pola súa banda, a ocupación aumentou un 1,27% na Comunidade galega, con 13.900 novos postos de traballo máis respecto ao trimestre anterior.
Deste xeito, o número de ocupados en Galicia situouse nos 1,10 millóns de traballadores, un 2,65% máis que no mesmo trimestre de 2021, gañando 28.500 empregados desde xuño de 2021, sempre segundo datos do INE, recollidos por Europa Press. Deles, case un 52% son homes e un 48%, mulleres.
O número de parados descendeu en 12.900 persoas nos últimos 12 meses, un 8,49% menos que entre abril e xuño do exercicio previo. Do total de 139.400 desempregados, un 48,5% son homes e un 51,5%, mulleres.
Entre outros datos, en Galicia hai máis de 1,24 millóns de persoas activas (persoas que teñen un emprego ou están en procura activa para conseguilo), o que supón un 0,99% máis que no trimestre anterior e un 1,27% máis que entre abril e xuño de 2021.
Ademais, a poboación de 16 ou máis anos subiu no último trimestre un 0,06%, ata 2,34 millóns de galegos, unha subida do 0,04% se se compara co mesmo trimestre do exercicio previo.
DATOS NACIONAIS. A nivel nacional, o paro baixou en 255.300 persoas entre abril e xuño deste ano, o maior descenso para un segundo trimestre desde 2018, e o número de parados caeu por baixo de tres millóns por primeira vez desde 2008.
Así mesmo, a ocupación aumentou en 383.300 postos de traballo entre abril e xuño, un 1,91% respecto ao trimestre anterior, aínda que supón unha cifra máis baixa do incremento de 464.900 de traballadores que se rexistrou hai un ano.
Ao finalizar xuño, o número total de parados situouse en 2.919.400 persoas e o de ocupados, en 20.468.000 persoas, sempre segundo datos da EPA.
Cabe destacar a cifra de 20,47 millóns de ocupados é a máis alta desde 2008 e que aproxímase ao máximo histórico de 2007, mentres que é a primeira vez desde 2008 que o número de parados está por baixo dos tres millóns.
No segundo trimestre a taxa de paro diminuíu máis dun punto, ata o 12,48%, e a taxa de actividade subiu en dúas décimas, ata o 58,71%, tras aumentarse o número de activos en 128.800 persoas entre abril e xuño (+0,5%).
No último ano o paro caeu en 624.400 persoas (-17,67) e creáronse máis de 796.400 de empregos (+4,05%). Ademais, o volume de activos aumentou en máis de 171.9000 persoas.
