Norvento emprende unha nova liña de negocio centrada en desenvolver solucións e plantas de biogás para o sector primario. A compañía de renovables non é neófita neste campo, pois xa levaba operando neste sector desde 2013, realizando I+D, enxeñería e proxectos chave en man de biogás. No entanto, con este novo paso, o grupo lucense aspira a consolidar "e unificar" o seu portfolio de solucións, "talento e coñecemento en torno ao biogás para industrias como a avícola ou a cárnica". O foco está posto tanto en empresas privadas como no sector público, e a idea é que poidan producir gas renovable xa sexa para xerar electricidade ou enerxía térmica, ou incluso para o seu uso como combustible de vehículos ou para inxectar á rede de gasodutos.
O seu obxectivo é "liderar" un mercado que está chamado a despegar en España nos próximos anos grazas tanto á maduración da tecnoloxía como á existencia dun marco regulatorio máis favorable para as renovables de cara a alcanzar os obxectivos de potencia instalada marcados na Axenda 2030 de Nacións Unidas, que fixou unha cota mínima do 32% das renovables no consumo final de enerxía. Neste marco, Norvento incide en que o biogás xogará un papel "chave" para contribuír á economía circular e facilitar a xestión de residuos orgánicos.
Para encabezar esta nova unidade, a compañía fundada por Pablo Fernández Castro nomeou como responsable do negocio de biogás a Javier Taibo. Enxeñeiro de Camiños, Canles e Portos pola Universidade da Coruña e MBA por Insead, desenvolveu a súa carreira tanto en España como no estranxeiro e ten "ampla experiencia" en construción, máquina pesada e en materia enerxética. "A diferenza doutros mercados como o alemán, onde as solucións de biogás xa están consolidadas en gran número, o español apenas conta con dous centenares de plantas, polo que o seu potencial de crecemento é exponencial se se ten en conta a posible evolución do marco normativo nacional e a maduración da tecnoloxía», sostén Taibo. O directivo augura que esta tecnoloxía terá "cada vez máis protagonismo no mix enerxético" e que, "coa súa experiencia previa", Norvento se sitúa "nunha posición estratéxica para liderar este sector".
Taibo explica que, "con apenas dous centenares de plantas", o potencial de expansión de biogás en España é "expoñencial"
Situada no polígono das Gándaras, Norvento mantense como unha compañía con capital 100% español. Fundada en 1981 como unha pequena empresa de enxeñería, hoxe conta con presenza internacional. A súa actividade abarca desde a fabricación de aeroxeradores de media potencia ou convertidores para almacenar enerxía, ata o deseño, promoción, construción e explotación de parques eólicos, proxectos de xeración distribuída para a industria e solucións de ingenería enerxética. O grupo conta hoxe con máis de 250 megawatts (MW) de plantas de xeración renovable en explotación, máis de 750 MW desenvolvidos e outros 1.000 en desenvolvemento en España e fóra.ç
Proxección internacional
Norvento desenvolverá proxectos en España nunha primera fase para despois dar o salto fóra. A unidade traballará co resto de áreas do grupo enfocadas ao autoconsumo para ofrecer solucións integrais aos seus clientes con tecnoloxías complementarias como a fotovoltaica e o almacenamento.
Experiencia
Norvento opera unha planta experimental de 50 kW nunha granxa de Cospeito para xerar electricidade e calor.Tamén participa no proxecto Varal, orientado a producir biogás a partir do lactosuero e correntes residuais da queixería Prestes de Vilalba.
