As opcións de atopar un emprego aumentaron coa reactivación económica en Galicia, aínda que a desaceleración comeza a facer dano no mercado laboral. Segundo o Instituto Nacional de Estadística (Ine), no segundo trimestre na comunidade existían 3.664 vacantes, unha cifra que, a pesar de reflectir un incremento do 3,6% a nivel interanual, supón un descenso do 17% respecto das ofertas rexistradas entre xaneiro e marzo. En contraposición, no conxunto de España, a cifra de postos dispoñibles —un total de 107.531— sitúase no seu nivel máis elevado desde que o Ine comezou a elaborar este estudo en 2013.
Este aumento da oferta laboral é cando menos rechamante nun país que aínda carga con 3,2 millóns de parados e é indicativo de que, en moitos casos, os perfís de quen buscan unha oportunidade non casan co que demandan as empresas.
Do cruzamento das vacantes coa cifra de desempregados —140.400 en Galicia— extráese que, na comunidade, tocan a uns 38 desocupados por cada oferta activa. Aínda que a competencia segue sendo elevada e incrementouse en relación ao primeiro trimestre do ano, o certo é que a situación mellorou en comparación cos últimos anos, pois no segundo trimestre de 2014 chegáronse a rozar os 200 parados por cada vacante.
O 5,7% dos empresarios declara non ampliar o seu persoal en Galicia polos custos de contratación
No conxunto do Estado, a concorrencia é algo menor, pois hai unhas 30 persoas en busca dunha oportunidade laboral por cada contrato a cubrir. As diferenzas son importantes a nivel territorial, pois mentres en Estremadura e Canarias o cociente elévase ata 98, Navarra ten apenas oito parados por vacante.
¿Que sectores concentran a oferta? A nivel estatal, as administracións copan o 27%, seguidas do comercio (12), sanidade e servizos sociais (9,3) e hostalería (9,2).
En canto aos motivos que alegan as empresas para non realizar novas contratacións, o Ine reflexa que no 5,7% dos casos os patróns galegos culpan aos elevados custos laborais, unha porcentaxe lixeiramente superior ao do conxunto do Estado (4,5%). No 90,9% dos casos, os empresarios galegos aseguran que non precisan ampliar máis o seu plantel.
