Un total de 364.987 galegos beneficiáronse xa da rebaixa do Imposto de Sucesións aprobada pola Xunta de Galicia. Desde o ano 2016 non se pagan impostos polos primeiros 400.000 euros entre familiares directos, sen contar a vivenda habitual, polo que esta medida favoreceu o 99% dos contribuíntes.
Desta cantidade, practicamente un de cada tres, un total de 110.313, son beneficiarios por pactos sucesorios en vida.
A intención do Goberno galego é seguir avanzando na práctica supresión deste imposto para as persoas que reciben unha herdanza dun familiar directo, un ámbito no que Galicia foi pioneira e, posteriormente, sumáronse outras comunidades autónomas.
Así, nos orzamentos para o ano 2020 inclúese unha ampliación desta rebaixa do Imposto de Sucesións, de forma que pasará a quedar exento de tributación 1 millón de euros por herdeiro, excluída a vivenda habitual.
Con esta medida, a partir do 1 de xaneiro de 2020, o 99,9% dos galegos non pagará Imposto de Sucesións entre familiares directos. A Xunta de Galicia tamén mantén a rebaixa entre irmáns, en vigor desde este ano, e que xa beneficiou a máis de 750 galegos. Desta forma, elimínase a tributación para seis de cada 10 herdanzas para este colectivo e Galicia mantense entre as comunidades con menor tributación para as herdanzas entre irmáns.
O Executivo autonómico tamén quere seguir favorecendo en 2020 as sucesións nas empresas familiares co obxectivo de que este importante tecido empresarial non só se manteña en xeracións futuras, senón que quede en Galicia.
Por iso, nos orzamentos do próximo ano amplíase o acceso ás reducións xa en vigor neste ámbito, tanto nas sucesións como nas doazóns.
Impostos cero no rural
Unha das prioridades da Xunta de Galicia en materia tributaria é a estratexia de Impostos Cero no rural, combinada coas rebaixas de tributos en zonas pouco poboadas para favorecer as parroquias con menos dinamismo. O obxectivo final é fixar poboación e que sexa máis fácil vivir no medio rural e vivir do medio rural.
Desde hai tres anos en Galicia non se pagan impostos por transmitir solo rústico e son máis de 64.800 os galegos que non pagaron impostos por adquirir un ben rústico ou ampliar unha explotación agraria.
Igualmente, desde hai dous anos o Goberno galego eliminou os impostos para comprar unha vivenda habitual en zonas pouco poboadas (ZPP) aos menores de 36 anos, ás familias numerosas e ás persoas con discapacidade, cun total de 3.481 beneficiarios xa.
Debido ao amplo apoio social, o Executivo autonómico busca reforzar en 2020 a baixada de impostos para todos aqueles que compren unha vivenda en ZPP, que representan o 94 por cento do territorio.
Menor tributación de España
Por unha banda, os orzamentos autonómicos do próximo ano rebaixan dous puntos o Imposto de Transmisións Patrimoniais, do 7 ao 5 por cento, cun límite de renda e patrimonio, para que comprar unha vivenda na zona rural galega teña a menor tributación de toda España.
E, por outra banda, as contas de 2020 diminúen catro puntos o Imposto de Transmisións Patrimoniais, do 10 ao 6 por cento, para o resto de vivendas en zonas pouco poboadas.
Dedución verde en 2020
Outra das novidades nos orzamentos para o próximo ano é a incorporación no IRPF (Imposto da Renda das Persoas Físicas) dunha nova dedución verde, que permitirá bonificar ata o 15% do investimento en melloras enerxéticas en vivendas, ata un máximo de 9.000 euros, de maneira que se suba a letra de cualificación enerxética do inmoble.
En total, os galegos poderán deducirse ata 1.500 euros porque á bonificación máxima de 1.350 euros súmanse 150 para cubrir a emisión do certificado de eficiencia enerxética.
Ademais, a este conxunto de rebaixas fiscais hai que engadir en 2020 o cada vez máis importante volume de beneficios fiscais incluídos no orzamento autonómico, que entrará en vigor o 1 de xaneiro de 2020.
De carácter social
As contas da Xunta sinalan que o 95% destes beneficios fiscais son de carácter social, é dicir, a favor das familias, con especial incidencia en colectivos prioritarios de actuación como novas, discapacitados, maiores ou familias numerosas.