Sete galegas figuran no ranking das 100 mulleres líderes en España que elabora Mulleres&Cia e na lista das dez recoñecidas polas súas traxectorias de éxito no exterior por esta organización. Entre elas hai dúas lucenses: a conselleira delegada de Grupo Leche Río, Carmen Lence
Entre o centenar de mulleres distinguidas polo seu talento e achega ao liderado feminino dentro do país, a presidenta do grupo Lence desde hai dous anos ocupa o posto 55 pola súa traxectoria e perseveranza. No máis alto desta clasificación están dúas vicepresidentas do Goberno e ministras galegas: a coruñesa Nadia Calviño, titular de Economía no Executivo central, seguida da ferrolá Yolanda Díaz, á fronte da carteira de Traballo.
O podio complétao outra galega. Trátase de Irene Souto Blázquez, xefa do departamento de Desenvolvemento Portuario e Comercial do Porto da Coruña.
Xa no posto 63 atópase Sonsoles Ónega. Aínda que a presentadora de televisión e escritora naceu en Madrid, ten raíces lucenses. É filla do xornalista polense Fernando Ónega. Ela foi a encargada de conducir este mércores a gala que recoñeceu as mulleres máis influentes. Unha das novidades desta edición é que foron recoñecidas fóra de concurso unha decena de españolas que se desempeñan con éxito no exterior.
Entre elas figura Ana José Varela, a primeira muller en ocuparse dos orzamentos da OCDE desde a súa sede en París.
Tamén está na lista a futbolista compostelá Verónica Boquete. A centrocampista xoga na actualidade no AC Milán.
