Os prezos dos carburantes de automoción máis consumidos en España, a gasolina 95 e o gasóleo, rexistraron caídas na terceira semana de xaneiro, co que rompen con case dous meses consecutivos á alza.
Segundo os datos do boletín petroleiro da Unión Europea coñecidos este xoves, a gasolina de 95 octanos marcou na última semana un prezo medio de 1,241 euros por litro, un 0,32% menos que a semana pasada, e o gasóleo, de 1,129 euros, un 0,62% menos. No entanto, con respecto a principios de ano, ambos os carburantes están máis caros: a gasolina 95, un 0,40%, e o diésel, un 0,18%.
No último mes a gasolina rexistrou un incremento do 3,33%, mentres que no caso do gasóleo a porcentaxe situouse no 3,67%. En termos interanuais, comparando a terceira semana de 2017 coa de 2016, a gasolina subiu un 9,8%, en tanto que o gasóleo fíxoo case un 18%.
A pesar destes incrementos, os prezos da gasolina e do gasóleo son un 18,4% e case un 22% máis baratos que os máximos que rexistraron na semana do 3 de setembro de 2012.
Entón, a gasolina vendíase a unha media de 1,52 euros, mentres que o gasóleo facíao a 1,45 euros. Cos datos desta semana, encher un depósito medio de gasolina de 55 litros custa esta semana 68,2 euros e facelo con gasóleo, 62 euros.
Os prezos dos carburantes caen e rompen con case dous meses á alza
Encher un depósito medio de gasolina de 55 litros custa esta semana 68,2 euros e facelo con gasóleo, 62 euros
