O 65% dos mozos galegos estaría disposto a emprender un negocio, aínda que só un 21% está familiarizado coas posibilidades de financiamento e axudas para este colectivo que ofrece o Goberno, segundo unha enquisa de Adecco publicada hoxe.
Deles, o 9 % cre que o seu negocio triunfaría, fronte a un 13,5 % que non o ve posible e un amplo 77,5 % que ten dúbidas sobre o éxito da empresa.
Máis da metade dos futuros emprendedores considera necesario aumentar as axudas económicas para fomentar a creación de empresas, tamén cren na necesaria redución dos trámites burocráticos e na aprobación de axudas fiscais.
A sondaxe mostra que os traballadores por conta allea son os máis dispostos a emprender seguidos dos estudantes e os desempregados.
Polo momento as novas tecnoloxías non triunfan e o 43,4 % dos enquisados optaría por crear un negocio físico, fronte ao 11,6 % que apostaría por un negocio online. O 45 % restante optaría por unha combinación das dúas propostas, contando cun negocio físico que se expandise a través da rede.