O primeiro ministro grego, Alexis Tsipras, convocou para o domingo da próxima semana un referendo sobre a oferta de acordo dos acredores.
"A consulta realizarase o domingo 5 de xullo" e a pregunta será "se" ou "non" ás últimas propostas dos acredores, dixo Tsipras pasada a medianoite nunha mensaxe televisada tras unha reunión urxente do Consello de Ministros.
O primeiro ministro asegurou que respectará calquera que sexa a vontade do pobo e engadiu que este sábado enviará ás institucións europeas unha carta na que solicitará un adiamento de "uns días" da actual prórroga do rescate que vence o vindeiro martes, para que os cidadáns poidan "decidir sen presión".
"Quero que nesta cuestión respondan con orgullo e responsabilidade", dixo Tsipras quen engadiu que "Grecia necesita enviar unha mensaxe de democracia cara a Europa".
Europa seguirá sendo unha parte de Europa, pero "Europa sen democracia é unha Europa sen identidade nin sentido", subliñou Tsipras, quen cualificou de "ultimato" o comportamento dos socios. "Temos que responder a este ultimato coa vontade do pobo", dixo.
O primeiro ministro asegurou que xa informou desta decisión á chanceler alemá, Angela Merkel, ao presidente francés, Francoçois Hollande, e ao gobernador do Banco Central Europeo, Mario Draghi.
Para este sábado á doce hora local (09.00 GMT) convocouse unha reunión extraordinaria do Parlamento, que deberá votar a solicitude de referendo, e para a mesma xornada está prevista unha reunión entre o vice primeiro ministro, Yannis Dragasakis, o viceministro de Relacións Internacionais Económicas, Euclidis Tsakalotos, e Draghi.
Varios representantes do Goberno, entre eles o ministro de Estado, Nikos Pappás (man dereita de Tsipras), así como o titular de Enerxía, Panayotis Lafazonis, mostráronse confiados en que o pobo votará con "un rotundo 'non'".
Tsipras fixo este anuncio tras unha reunión do gabinete ministerial convocada esta noite para informar sobre a oferta de prórroga do rescate de cinco meses proposta polas institucións (Comisión Europea, Banco Central Europeo, Fondo Monetario Internacional).
A prórroga ía acompañada dun programa de medidas que entre outras cousas esixía, como sinalou Tsipras, "máis recortes no sector público e aumentos do IVE nos alimentos e as illas".
"Isto demostra que algúns dos socios non teñen como obxectivo un acordo sostible", sostivo o líder esquerdista.