A pensión media sitúase en Galicia en 777 euros en xuño, un 2% máis

Galicia é unha das tres comunidades autónomas coa pensión media máis baixa en xuño, de 777,34 euros fronte aos 920,2 euros do conxunto de España, o que supón un 2% máis que o mesmo mes de 2016, segundo os datos que publica este martes o Ministerio de Emprego e Seguridade Social.

A pensión media do sistema comprende as distintas clases (xubilación, incapacidade permanente, viuvez, orfandade e a favor dos familiares) e, xunto a Galicia, contabilizan as máis baixas Estremadura (765,21), Murcia (808,98) e Andalucía (826,16).

Pola contra, lograron as cifras máis altas País Vasco (1.142,2), Madrid (1.087,13), Asturias (1.085,27), Navarra (1.056,63), Aragón (966,75) e Cantabria (966,22).

A comunidade galega rexistrou en xuño un total de 758.128 pensións, das que 470.774 son por xubilación (884,52 euros), 187.325 por viuvez (548,17 euros), 69.787 por incapacidade permanente (835,15 euros), 24.050 por orfandade (372,68 euros) e 6.192 en favor de familiares (481,31 euros).

No conxunto de España, o gasto mensual en pensións contributivas aumentou un 3 % interanual en xuño, ata alcanzar os 8.747,5 millóns de euros. A pensión media de xubilación ascendeu a 1.063,1 euros mensuais, un 2% máis que no mesmo mes do exercicio anterior. 

O sistema público pagou en xuño un total de 9.505.965 pensións contributivas, o que supón un 1,1 % máis que o ano anterior. A maioría foi por xubilación con 5.815.973, seguidas de viuvez con 2.360.021; de incapacidade permanente, 947.616; de orfandade, 341.648, e a favor de familiares, 40.707.

A maior parte do gasto en pensións destinouse ás de xubilación (6.183 millóns de euros), seguido das de viuvez (1.525 millóns), incapacidade permanente (887.344 euros), orfandade (129.640 euros) e a favor de familiares (21.802 euros).

Dentro da xubilación e por réximes, a pensión media máis alta correspondeu á minería do carbón (2.112,23 euros mensuais), seguida por enfermidades profesionais (1.646,73), do réxime xeral (1.208,16), dos traballadores do mar (1.207,25) e os de accidentes de tráfico (1.108,61).

Pola contra, as pensións medias de xubilación máis baixas foron as do Seguro Obrigatorio de Vellez e Enfermidade con 381,13 euros, e os traballadores autónomos, con 709,85.