A pensión media na comunidade autónoma de Galicia foi en maio de 761,53 euros, cun crecemento do 1,9% en relación co mesmo mes de 2015, segundo os datos do Instituto Nacional da Seguridade Social (INSS) do Ministerio de Empleo e Seguridad Social. O número de pensións situouse en maio, ademais, nun total de 753.600, o que representa un incremento do 0,6% con respecto ao mesmo mes do ano anterior.
O conxunto do sistema público conta con 9.384.016 pensións contributivas, o que representa un incremento do 1,13% respecto ao ano pasado. Máis da metade, 5.712.582, concretamente, son por Xubilación; 2.355.188 corresponden a Viuvez; 936.281 a Incapacidade Permanente; 340.462 a Orfandade e 39.503 a favor de Familiares. A nómina mensual de pensións contributivas da Seguridade Social alcanzou os 8.467,28 millóns de euros o pasado 1 de maio, máis dun 3% superior á do ano anterior.
A pensión media de xubilación alcanzou os 1.041,15 euros, un 2,10% máis respecto do mesmo período do pasado ano. En canto á pensión media do sistema, que comprende as distintas clases (xubilación, incapacidade permanente, viuvez, orfandade e a favor de familiares), situouse en 902,31 euros, o que supón un aumento interanual do 1,88%.
A Seguridade Social fai pública cada mes esta estatística co obxectivo de ofrecer a cidadáns información precisa sobre a evolución do número e custo das pensións do Sistema.
A pensión media en Galicia é de 761,53 euros, un 1,9% máis que hai un ano
O número de pensionistas aumentou un 0,6% con respecto ao mesmo mes do ano anterior
