A morosidade do crédito concedido por bancos, caixas, cooperativas e establecementos financeiros que operan en España baixou en xuño por segundo mes consecutivo, ao 13,06 %, logo de caer en maio ao 13,39 %, co que confirma a tendencia descendente tras a subida puntual rexistrada en abril, cando o cociente se situou no 13,44 %.
Segundo os datos provisionais publicados hoxe polo Banco de España, o sistema financeiro español acumulaba a finais de xuño unha carteira de créditos morosos de 185.862 millóns de euros, 3.590 millóns menos que os 189.452 millóns do mes anterior.
Pola súa banda, o volume total dos créditos concedidos polas entidades financeiras aos seus clientes elevouse por primeira vez desde xaneiro e alcanzou os 1,422 billóns de euros, desde os 1,414 billóns de maio.
As pequenas caídas rexistradas por este indicador durante os tres primeiros meses do ano debéronse ao cambio na forma de cálculo do mesmo, que o Banco de España fixo efectiva o pasado 1 de xaneiro e que pasou a incluír no cómputo total do crédito o correspondente aos Establecementos Financeiros (EFC).
Nos últimos doce meses, a taxa de mora elevouse en pouco menos dun punto porcentual e medio, xa que en xuño de 2013, o cociente situábase no 11,61%.
Desde entón, o volume de créditos dubidosos, que son os que non se pagan durante tres meses seguidos, creceu en 9.219 millóns, bastante menos que os 19.227 millóns que aumentou no mes anterior en comparación con xuño de 2013.
O grupo de entidades formado por bancos, caixas e cooperativas de crédito ou caixas rurais, tamén viu caer lixeiramente a súa taxa de impagados ata o 13,19 %, desde o 13,52 % rexistrado en maio.
Neste grupo, cuxas cifras se presentan agregadas, só separadas dos Establecementos Financeiros de Crédito (EFC), o saldo dos créditos dubidosos tamén caeu ata os 180.511 millóns, fronte aos 184.103 millóns do mes anterior.
A carteira crediticia conxunta destes tres tipos de entidades subiu lixeiramente en xuño, ata os 1,368 billóns de euros, desde os 1,361 billóns de maio.
En canto aos EFC, a morosidade mantívose en xuño por cuarto mes consecutivo no 10,79 %, tras permanecer en torno ao 10,40 % durante os tres meses anteriores.
A carteira crediticia destas entidades, dedicadas fundamentalmente a financiar bens de consumo, aumentou lixeiramente, ata os 35.295 millóns, desde os 34.915 millóns de maio, igual que os créditos dubidosos, que avanzaron ata os 3.808 desde os 3.769 millóns de maio.
