A expansión do coche eléctrico cálase ao faltar axudas públicas e rede de recarga

O vehículo eléctrico non acaba de despegar como alternativa aos motores propulsados por diésel ou gasolina, a pesar da carestía dos carburantes. En 2016 matriculáronse 4.746 turismos, vehículos comerciais, industriais e buses alimentados con electricidade en España, unha cifra que, a pesar de supor un notable incremento do 51,5% respecto de 2015, está moi lonxe dos 31.019 híbridos vendidos por non mencionar os 1,1 millóns a combustible. A cota dos eléctricos suma un pírrico 0,41%. En Galicia, das 41.528 unidades matriculadas en 2016, só 55 foron da opción máis ecolóxica e 1.293, híbridos.

Un prezo elevado, a falta de axudas públicas tras o fin do plan Movea polo que se incentivaba con entre 2.500 e 5.500 euros a compra de turismos eléctricos e con entre 8.000 e 20.000 os furgóns, camións e autocares están entre os condicionantes que reducen o atractivo desta tecnoloxía. Así o indica a patronal de fabricantes Anfac, que constata que tamén frea a demanda o incipiente desenvolvemento das infraestruturas de recarga. A isto habería que engadir outro escollo: a aínda escasa autonomía destes automóbiles.

Nun contexto no que a redución da polución urbana adquiriu unha prioridade máxima, a tecnoloxía eléctrica vai introducíndose lentamente nas flotas de buses, con 22 matriculacións en 2016 en España, fronte ás 8 do ano anterior. Tamén comeza a percibirse certo avance nas flotas comerciais, con 849 vendas e os Renault Kangoo e Nissan NV200 entre os modelos con máis demanda.

Pero maior é o tirón das iniciativas de carsharing, isto é, de coche compartido, que están a impulsar fabricantes como PSA. En colaboración con Eysa, o grupo francés puxo en marcha en decembro en Madrid o servizo Emov, en cuxo marco se alugan 500 Citroën C-Zero con 150 quilómetros de autonomía, unha nova tendencia enfocada sobre todo aos mozos pois o usuario pode coller e deixar o coche en calquera punto da cidade que estea na zona de servizo e reservar a través de internet. Previamente, na capital, Daimler lanzou Car2Go, que con 500 Smart dispoñibles a un custo de 19 céntimos por minuto ou 59 euros día máis gastos de rexistro supera os 140.000 usuarios.

GANCHOS. A falta de que o Ministerio de Economía aclare se reditará as axudas que incentivaban a compra e a instalación de puntos de recarga en zonas públicas, os fabricantes inciden nos beneficios fiscais. Ademais de estar exentos do imposto de matriculación, os vehículos eficientes poden transitar nos días nos que se restrinxe a circulación pola contaminación, como sucede en Madrid.

Outros ganchos son a exención de pago en zonas de aparcadoiro regulado, os descontos en peaxes e o acceso a carrís destinados a vehículos de alta ocupación (VAO) ou limitados aos buses. Os incentivos esténdense ao IRPF en caso de traballadores cuxa retribución se satisfaga en parte coa cesión dun coche de empresa. E é que Hacienda contempla unha minoración do 30% da valoración da retribución en especie por uso de vehículos eléctricos.

ESTRATEXIA GALEGA. Tras o pobre resultado cultivado polas versións eléctricas da Berlingo e a Partner fabricadas en Vigo con axudas públicas, a Xunta centra a súa política de investimentos nas pemes. Entre os proxectos en desenvolvemento na aceleradora Business Factory Auto creada coa Zona Franca, o clúster Ceaga e PSA figura CABB16, que desenvolve un sistema de distribución eléctrica e electrónica ultralixeira para a súa montaxe en coches de nova xeración. Pola súa banda, VMS Automotive traballa nunha motocicleta de tres rodas propulsada con electricidade.

En paralelo, a Axencia Galega de Innovación e Repsol buscan incrementar a vida útil das baterías e mellorar os procesos de recarga nunha investigación conxunta.