A Cig denunciou este xoves o despedimento improcedente de cinco operarios da empresa auxiliar da automoción PGA Antolín, do Porriño, e criticou que a compañía pretende "unha redución progresiva" do seu persoal. Nun comunicado, o sindicato nacionalista advertiu de que a empresa, que ten 120 traballadores, busca unha redución progresiva dos seus operarios "para non crear alarma social", e avanzou que estas rescisións de contratos poderían "estenderse" a outras auxiliares do sector.
En sinal de protesta por estes despedimentos, unha vintena de persoas concentráronse fronte á sede da empresa, situada no polígono das Gándaras. Segundo a CIG, as rescisións destes cinco contratos xustificáronse con "mentiras e falsidades" de PGA Antolín.
O sindicato alertou de que estes despedimentos "pretenden amedrentar aos empregados" en previsión de problemas de futuro ante un posible descenso da carga de traballo. O presidente do comité de empresa de Grupo Antolín, Felipe Domínguez, sinalou que a situación podería empeorar no 2012 xa que á empresa fóronlle asignadas "poucas pezas" dos novos modelos de PSA Peugeot-Citroën.
