Os máis de cen traballadores que integran o persoal de Ingemarga, situada no municipio lucense de Guitiriz, esperan desde hai días noticias da administración concursal da empresa en relación coas liñas de crédito que solicitou para manter a actividade produtiva da granitera, porque diso tamén depende que cobren o salario correspondente ao mes de xaneiro.
O secretario comarcal do sector da Construción da CIG en Lugo, Alfonso Losada, recoñeceu que "a empresa está pendente da concesión desas liñas de crédito" para comprobar se ten os fondos necesarios para "traballar día a día" e facer fronte aos pedidos dos clientes. "Esa é a idea, polo menos, da administración concursal", dixo o representante sindical.
Alfonso Loasa, de CIG, asegura que a empresa "di que traballo hai"
Alfonso Losada confirmou que a administración concursal de Ingemarga –que actualmente conta cun persoal de 125 traballadores– "di que traballo hai", pero se está cobrando cunha marxe de tres a seis meses", de modo que a empresa necesita desas liñas de crédito para manter a actividade produtiva.
En canto aos traballadores, que xa "levan dous meses sen cobrar" nin un euro polo seu traballo, "están nerviosos", dixo Losada, quen confía, en todo caso, en que esta semana o persoal teña noticias por parte da administración concursal sobre o futuro da empresa e os salarios que lles debe.
