Inditex atravesou o difícil escenario que impuxo o coronavirus cunhas ganancias de 1.106 millóns de euros no exercicio fiscal de 2020 pechado en xaneiro, o que supón un descenso interanual do 69,6 % (3.639 millóns en 2019) e a menor ganancia desde a crise de 2009.
As vendas do grupo téxtil ao que pertencen cadeas como Zara ou Bershka sumaron 20.402 millóns baixo o impacto dos peches e as restricións, un 28 % menos que no exercicio anterior, o que comunicou este mércores á Comisión Nacional do Mercado de Valores (CNMV).
Unha dos avances durante a pandemia do coronavirus para Inditex foi a venda en liña, cun incremento do 77 % a tipo de cambio constante en 2020, ata 6.612 millóns, á vez que as horas de venda nas súas tendas físicas reducíronse un 25,5 % respecto de 2019.
De feito, e segundo informa a compañía, a 31 de xaneiro de 2021 o 30 % das tendas estaban en peche total (fronte ao 8 % a 31 de outubro de 2020) e o 52 % tiñan restricións.
En cambio, as visitas en internet en 2020 alcanzaron os 5,3 miles de millóns, un 50 % máis, con 200 millóns de seguidores en redes sociais do grupo e 132 millóns de aplicacións activas.
O beneficio bruto de explotación (ebitda) foi de 4.552 millóns, un 40 % menos que no exercicio precedente.
Por zonas xeográficas, as vendas en tenda e en liña en España supuxeron o 14,6 % do total (15,7 % en 2019), mentres que Europa sen España representou o 48,7 % (46 % en 2019); Asia e resto, o 23,2 % (22,5 %), e América, o 13,5 % (15,8 %).
Por formato, as vendas de Zara e Zarahome figuran á cabeza en 2020 con 14.129 millóns, 5.435 millóns menos que en 2019; seguido por Pull&Bear (1.425 millóns), Massimo Dutti (1.197 millóns), Bershka (1.172 millóns) Stradivarius (1.283), Oysho (522) e Uterqüe (75).
A posición financeira neta alcanzou os 7.560 millóns a 31 de xaneiro de 2021 (8.060 millóns en 2019), cuns investimentos en 2020 de 713 millóns.
En canto á política de dividendo, o Consello de Administración de Inditex proporá á xunta de accionistas un dividendo de 0,70 euros por acción para o exercicio 2020, composto por un ordinario de 0,22 euros e un extraordinario de 0,48 euros por acción.
O dividendo componse de dous pagos iguais de 0,35 euros por acción que se efectuarán o 3 de maio de 2021 e o 2 de novembro de 2021, en tanto que os restantes 0,30 euros de dividendo extraordinario pagaranse no exercicio 2022, informou o grupo.
Os investimentos no período 2020-2022 alcanzarán uns 900 millóns anuais, en tanto que o investimento dixital espérase na contorna de 1.000 millóns ao longo destes 3 próximos anos.
