A tempada de compras do Nadal achégase e con ela aumenta o risco de caer nas redes dos ciberdelincuentes, que argallan para intentar estafarnos de formas moi variadas. Con motivo do Black Friday, unha das grandes festas do consumismo, teñen unha boa ocasión para actuar. Este ano celébrase o 25 de novembro, e tres días despois chegará o coñecido como Cyber Monday.
- Moito coidado cos correos electrónicos que piden datos
- Atención aos SMS que parecen ser dunha entidade de confianza
- Consellos a ter en conta para comprar por internet
- A importancia de actualizar o navegador e ter antivirus
Nestas datas, as compras por internet dispáranse e é bo quitar o piloto automático e actuar con moita prudencia. Estas son algunhas das recomendacións para non caer na trampa e protexernos.
Moito coidado cos correos electrónicos que piden datos
O ciberataque por excelencia nestas semanas nas que tiraremos máis da tarxeta consiste en roubar o nome do usuario e o contrasinal, o chamado phishing. Os atacantes envían un correo electrónico, que simula proceder dunha marca ou tenda coñecida, no que se inclúe un enlace a un portal falso e solicítanse datos. A mensaxe sería similar a esta: "Houbo un problema co seu pedido. Inicie sesión na súa conta e confirme os detalles do pago".
En lugar de facer clic no enlace do mal, o consumidor debe ir directamente á páxina web da marca real e iniciar sesión alí. Explícao o Colexio Profesional de Enxeñaría en Informática de Galicia (CPEIG), que advirte de que o phishing "é o punto de partida do 90% dos ciberataques que se producen actualmente".
Desconfía, polo tanto, se recibes un correo electrónico no que che piden datos persoais. O mellor é non abrir ningún enlace, descarga ou ficheiro asociados a un mail se ves calquera indicio ou patrón fóra do habitual.
Atención aos SMS que parecen ser dunha entidade de confianza
Outra ameaza moi activa nestes días de tanta compra online é recibir unha mensaxe de texto que simula proceder dunha entidade de confianza. No Black Friday, por exemplo, pode tratarse dun SMS dalgunha empresa de transporte que pide chamar a un número, clicar nun enlace ou facer un micropago para conseguir os datos persoais.
Moitas veces o comprador descoñece incluso que compañía entregará o pedido ante a cantidade de transaccións que se chegan a realizar de cara, por exemplo, ao Nadal.
Consellos a ter en conta para comprar por internet
A primeira recomendación é non realizar as compras conectados a unha rede wifi pública e visitar webs seguras, comprobando que na parte superior aparece o cadeado de garantía. Outro aspecto importante que destaca o CPEIG é non revelar xamais información persoal por email ou teléfono, como o número de tarxeta ou o enderezo.
Utilizar un cartón só para compras online é outro consello. Moitos bancos ofrecen cartóns virtuais gratuítos para este tipo de transaccións. Outra opción para quen quere minimizar riscos ou desexa comprar nunha páxina que non lle transmite demasiada confianza son os cartóns prepago, que se poden recargar.
Para evitar que, en caso de perda, alguén poida realizar compras por internet co noso cartón, a indicación é memorizar o código CCV e borralo.
Usar un correo electrónico específico para adquisicións na rede é outra medida de precaución, para evitar correos con virus. Para escapar de webs fraudulentas, aconséllase escribir a URL da páxina na barra de direccións en lugar de entrar a través dun enlace.
Á hora de validar unha compra por internet, o que se recomenda é ler ben a mensaxe do banco e revisar o concepto e o importe antes de dar o paso. Unha vez realizada a operación, é bo gardar os tickets.
A importancia de actualizar o navegador e ter antivirus
Actualizar o sistema operativo e as aplicacións é unha vía para evitar dar facilidades aos ciberdelincuentes, pois incorporarán as últimas melloras de seguridade. Utilizar ferramentas antivirus e antimalware é outro consello para previr estes ataques.
Só durante o primeiro trimestre do ano Galicia rexistrou 6.345 ciberestafas, segundo datos da Axencia para a Modernización Tecnolóxica. A poboación entre 25 e 45 anos é a máis afectada por estas actividades delituosas, que tamén sofren empresas e administracións públicas.
