Galicia finalizou marzo de 2021 con 1.190 oficinas operativas, o 5,5% do total estatal e un punto porcentual superior ao seu peso por negocio, segundo recolle A Economía Galega. Informe 2020-2021, publicación editada por Afundación, Idega e o Centro de Investigacións Abanca de Ieside.
Tras a presentación dun resumo executivo hai un mes en Santiago, desde este martes está xa dispoñible a versión extensa da que é a publicación decana ao redor da economía galega.
No seu apartado sobre o sector financeiro, o informe recolle que, desde 2008, máximo histórico, a rede de sucursais galega reduciuse "practicamente o mesmo que a estatal, un 53%, e as entidades con sede social na comunidade pasaron de oito a dúas (Abanca e Caixa Rural Galega)".
A primeira delas, Abanca, lidera o mercado galego tanto por rede de distribución como por negocio e o 40% das oficinas galegas están situadas na Coruña, o 30% en Pontevedra, o 16% en Lugo e o 14% en Ourense; porcentaxes que se mantiveron "estabilizados" nos últimos anos.
A distribución territorial das oficinas por parte das entidades financeiras con maior presenza en Galicia concéntrase "maioritariamente" nos municipios de maior dimensión, constata o informe.
As entidades con sede social en Galicia pasaron de oito a dúas: Abanca e Caixa Rural Galega
Neste contexto, é Abanca a que conta con maior "capilaridade" da súa rede, co 33% das súas oficinas nos municipios de menos de 5.000 habitantes; porcentaxe que case cuadriplica o da segunda entidade, que é o Banco Santander.
No 88% dos 313 municipios galegos presta servizos algunha entidade financeira, segundo o estudo, o que supón dar cobertura directa ao 99% da poboación galega.
AXUSTE DE CAPACIDADE. En calquera caso, a publicación recolle que o impacto da crise da covid nos niveis de rendibilidade do sector está "a acelerar" o proceso de concentración e axuste de capacidade que vén acometendo de xeito ininterrompido desde a anterior crise de 2007.
Xunto a isto, "a exponencial dixitalización da sociedade impulsada polos períodos de confinamento" e a irrupción de novos competidores dixitais (bigtechs e fintechs) incrementaron, advirte, "o foco sobre un dos principais retos aos que se enfronta o sector bancario: configurar entidades con modelos de negocio sostibles a longo prazo".
