Unha mariscada de agasallo para os pais galegos dos primeiros nenos ou nenas que nazan o próximo 19 de marzo, Día do Pai. Esa é a proposta que realizou a empresa de nbsp;venda&online de pesca artesanal e sostible Fresco y del Mar, con sede en Muros, ante o "descenso tan preocupante" das cifras de natalidade.
Deste xeito, desde a firma galega queren "recompensar ás parellas que soportaron confinadas os seus embarazos", conscientes da dificultade de ser pais en tempos de pandemia. En concreto, recibirán a mariscada catro familias galegas, unha por provincia.
"Aínda que non podamos celebrar en familia a chegada dun bebé tal e como nos gustaría, podemos facer a vida máis feliz aos novos pais e nais", asegura Milucho Louro, portavoz da empresa.
"Dentro das nosas posibilidades, como empresa dedicada á pesca artesanal queremos felicitalos tras esta onda de embarazos tan atípicos como complexos como mellor se fai en Galicia: cunha mariscada", engade Louro, convencido de que "nunca a espera dun novo membro na familia foi tan especial e, á vez, concentrou tantas dúbidas e incerteza".
Fresco y del Mar é unha empresa fincada no porto de Muros que vende pesca artesanal, xusta e sostible. Especializáronse no envío de marisco e peixe fresco a domicilio a toda España e o estranxeiro, tal e como será o lote (H)onda Papá que recibirán os pais e nais unha vez regresen do hospital aos seus fogares.
Os novos proxenitores só teñen que contactar con Fresco y del Mar (www.frescoydelmar.com) para mostrar a partida de nacemento dos seus bebés nacidos en Galicia durante a xornada do 19 de marzo. As parellas recibirán marisco da Costa da Morte para celebrar a vida dos novos galegos.
