O Banco Popular continúa coa súa estratexia de realizar unha nova ampliación de capital para poder seguir adiante ou levar a cabo operacións corporativas para mellorar a súa situación e negou que a entidade se atope en risco de quebra ou que se encargase a venda urxente do banco.
O Popular subliñou que a estratexia comunicada polo seu presidente, Emilio Saracho, na xunta de accionistas do pasado 10 de abril mantense "invariada", segundo comunicou este xoves á Comisión Nacional do Mercado de Valores (CNMV).
Neste sentido, o banco continúa traballando nunha estratexia que inclúe a potencial realización dunha ampliación de capital ou unha operación corporativa. Para iso, segundo explica, conta con asesores especializados que lle apoian no seu desenvolvemento.
O Banco Popular nega igualmente que exista un risco de quebra da entidade, que rexistrou perdas de 137 millóns de euros entre xaneiro e marzo, ou que se encargase a súa venda urxente.
Igualmente, desmente que o presidente do Consello de Administracións comunicase a outras entidades financeiras a necesidade inminente de fondos ante unha fuga masiva de depósitos ou que haxa datos da Asociación Española de Banca que alerten da perda de 6.000 millóns de euros de depósitos en xaneiro.
Nunha comunicación asinada por Francisco Aparicio Valls, conselleiro e secretario do Consello de Administración, o banco indica ademais que os procesos de desinversión de activos non estratéxicos "seguen o seu curso normal".
O banco presidido por Saracho subliña que, ao peche do trimestre, o patrimonio neto do banco ascendía a 10.777 millóns de euros e o cociente de capital total situábase en 11,91%, por encima das esixencias regulatorias.
O Popular nega que encargase a venda "urxente" da entidade
A entidade responde os rumores cun comunicado no que asegura que continúa coa súa estratexia para ampliar capital e desmente que estea en risco de quebra
