A demanda de celulosa ao grupo Ence para o segmento de tisú (papel hixiénico, papel de cociña, servilletas, panos de papel) aumentou case un 20% en marzo con respecto ao mesmo mes do ano anterior. Os datos foron divulgados este venres polo fabricante e reflicten un repunte que coincide coa extensión do coronavirus e a provisión de produtos elaborados con ese material.
O incremento da demanda é dun 5% con relación a febreiro, porcentaxe que se eleva a máis dun 7% no caso dos clientes europeos da compañía.
O papel tisú é un papel fino absorbente feito de pulpa de celulosa. Ence, cuxa celulosa ten como principal destino precisamente o papel tisú, conta con dúas plantas de produción de celulosa, a de Pontevedra e a de Navia (Asturias), que están a operar nestes días con normalidade asegurando a subministración da súa celulosa ao mercado, segundo sinalan as mesmas fontes.
A compañía xa adoptou hai un tempo un protocolo interno de prevención fronte ao coronavirus, que inclúe medidas preventivas para os traballadores de quendas das plantas, así como para o persoal loxístico e forestal, para reducir ao máximo os riscos.
