A Comisión Europea (CE) impuxo unha multa marca de 2.930 millóns de euros a fabricantes de camións pesados e de tonelaxe media por participar durante 14 anos nun cártel formado por MAN, Volvo e Renault, Daimler, Iveco e DAF, no que é a maior sanción por este tipo de práctica anticompetitiva.
A comisaria europea de Competencia, Margrethe Vestager, dixo que "non é aceptable" que estas multinacionais do sector, que representan nove de cada dez camións pesados e de media tonelaxe producidos en Europa, "formen parte dun cartel en lugar de competir uns contra outros". "Hoxe impomos a multa máis elevada por un só cartel. É o dobre que a sanción anterior imposta en 2012", de 1.409 millóns de euros, a unha decena de fabricantes de televisores que operaban no mercado comunitario por participar en dúas tramas de fixación de prezos de monitores de tubos de raios catódicos, dixo Vestager.
A comisaria recalcou que "hai boas razóns", porque o cartel "afectou a un mercado moi grande e durou durante moito tempo". En concreto, o cartel comezou en 1997 e durou 14 anos, ata que a CE efectuou en 2011 inspeccións non anunciadas no sector.
Aumento dos prezos de fábrica ou a introdución de novas tecnoloxías, algunhas das accións que levaron a cabo
A investigación da CE demostrou que unha reunión en Bruxelas foi "o punto de partida" dese cartel duradeiro, indicou, e a primeira reunión entre altos executivos dos fabricantes de camións foi organizada en xaneiro 1997 no que "parecía ser un hotel acolledor" e a violación das leis de competencia durou despois máis dunha década, na que se coordinaron. Reuníronse a miúdo para xestionar o cartel, que involucrou a directivos das sedes que se reuniron regularmente, normalmente nas marxes de eventos e feiras comerciais, encontros que se complementaron con conversacións telefónicas. A partir de 2004, o cartel foi organizado mediante subsidiarias dos fabricantes de camións en Alemaña e a través do intercambio de correos electrónicos.
A pesar desa maior "formalización" do cartel, en palabras de Vestager, os temas que abordaron as empresas seguían sendo os mesmos, principalmente a coordinación e aumentos do nivel bruto de prezos de fábrica para camións pesados e de tonelaxe media e que representa a base para a fixación de prezos na industria. O prezo final pagado polos compradores baséase despois en máis axustes feitos a nivel nacional e local a esta "lista" coordinada.
Tamén pactaron o calendario para a introdución de novas tecnoloxías requiridas para cumprir cos cada vez máis estritos estándares contra as emisións da UE, desde Euro III ata a actual normativa Euro VIN, de acordo coa CE. Igualmente acordaron pasar aos clientes os custos destas tecnoloxías, segundo a Comisión.
MAN recibiu inmunidade, ao revelar a existencia do cartel á CE
ACUSACIÓN. O Executivo comunitario acusou formalmente aos fabricantes de camións en 2014 e tamén iniciou entón procedementos contra Scania, pero este produtor non está cuberto pola multa deste martes e a investigación prosegue no seu caso baixo os estándares normais. MAN recibiu inmunidade, ao revelar a existencia do cartel á CE e evitou así unha sanción duns 1.200 millóns de euros.
As demais empresas recibiron reducións de entre o 10 e o 40 % pola súa colaboración na investigación e ademais todos os cinco fabricantes recibiron outra diminución dun 10 % da sanción ao admitir a súa participación no cartel. Neste sentido, MAN eludiu a multa na súa totalidade ao ser este produtor o que revelou a existencia do cartel á CE.
Volvo/Renault terá que pagar 670,5 millóns de euros, en tanto que Daimler foi multado con 1.008 millóns, Iveco con 494,6 millóns e DAF con 752,7 millóns. Estes fabricantes teñen agora tres meses para pagar a sanción, que irá ao orzamento da UE, indicou Vestager.
