A presidenta e conselleira delegada do Grupo Lence, Carmen Lence, foi designada pola "súa visión estratéxica, capacidade de innovación e liderado transformador" como gañadora en Galicia dos Premios Muller Empresaria CaixaBank 2021, segundo informou a propia entidade financeira.
Estes galardóns, precisa Caixabank nun comunicado, "recoñecen o talento e a excelencia profesional de empresarias en España; e fomentan as redes de contactos entre empresarias líderes no mundo".
"Lence é unha empresa láctea familiar, con máis de cinco décadas de historia, centrada na produción e comercialización de leite envasada principalmente baixo as marcas de bandeira Río e Leyma", explica, e "desde a súa incorporación á dirección do grupo, en 2019, Carmen Lence impulsou un plan estratéxico focalizado en investimento, innovación, imaxe de marca e expansión comercial".
Segundo os promotores do premio, "o compromiso social da empresa reflíctese a través da preservación rural, o patrocinio de entidades deportivas infantís, xuvenís e profesionais, e o impulso á muller".
A partir de agora, Carmen Lence, pola súa condición de gañadora territorial, formará parte da nova "Comunidade Muller Empresaria CaixaBank" en Linkedin, que reúne ás empresarias premiadas en todas as edicións dos Premios Muller Empresaria CaixaBank e ponas en contacto con outras redes de mulleres empresarias a nivel nacional e internacional como IWEC, International Women's Forum, Vital Voices ou EJE&CON.
Lence destacou que "supón unha honra recibir o Premio Muller Empresaria CaixaBank 2021". "En España hai cada vez máis mulleres empresarias", engadiu, "que están a facer un traballo extraordinario e quizá non coa suficiente visibilidade. Estas empresarias teñen que saber que o seu traballo, a súa determinación, o seu compromiso con facer unha diferenza, e o exemplo que dan para xeracións futuras, é tido en conta. Este recoñecemento é tamén para todas elas".
