Os condutores particulares notan o fin da bonificación ao carburante no seu peto. O impacto da súa retirada podería haberse visto contido se o prezo dos combustibles de automoción baixase nestas case dúas semanas sen o desconto, pero a realidade é que hoxe están máis caros que na véspera de desaparecer esa rebaixa de polo menos 20 céntimos por litro.
En Galicia, o diésel dispensábase este xoves a unha media de 1,698 euros, o que supón pagar un 13,8% máis que o 31 de decembro, último día coa bonificación que comezou a aplicarse a inicios de abril. Encher agora un depósito medio de 55 litros con este carburante sae por algo máis de 93 euros, o que implica desembolsar uns 11 euros máis que antes de perder a rebaixa.
Os datos que publica o Ministerio para a Transición Ecolóxica mostran como o prezo deste carburante empezou a subir en canto retirouse o desconto o 1 de xaneiro, aínda que pasados uns días comezou a moderarse un pouco. Aínda así, segue en niveis moi elevados. Non supera a barreira dos 2 euros o litro como chegou a ocorrer en outubro e novembro -aínda que entón si había desconto-, pero está lonxe dos tempos en que había chafarices co diésel a menos dun euro,
No caso da gasolina, os particulares pagan agora case un 16% máis por litro que xusto antes de finalizar a bonificación. O prezo medio sitúase agora en 1,645 euros, segundo despréndese dos datos que recompila a diario o Ministerio para a Transición Ecolóxica entre preto de 700 estacións de servizo da comunidade. Con esa cotización, encher un depósito medio de 55 litros require algo máis de 90 euros, o que supón deixarse nesa operación 12,4 euros máis que o último día de decembro.
Diferenzas
Hai que ter en conta, con todo, que as grandes petroleiras optaron por manter parte do desconto aos seus clientes, avivando a guerra comercial cos operadores low cost. Repsol, Galp, BP e Shell ofrecen unha rebaixa de ata 10 céntimos para os usuarios dos seus programas e aplicacións de fidelización.
Cepsa chega aos 12 céntimos se o condutor elixe combustibles premium da gama Óptima. Aínda así, encher pode saír moito máis económico nalgunhas gasolineiras de baixo custo. Por exemplo, os chafarices co diésel máis barato de Galicia son os de Eroski en Lugo, co litro a 1,469 euros. Os máis caros eran nos últimos días os de Valcarce na localidade ourensá do Bolo (1,849 euros).
