Randstad prevé que a campaña do Nadal xerará en Galicia ao redor de 25.330 contratos, o que supón un 26,6% máis que en 2020 e un 1,8% máis que en 2019, o último ano antes da pandemia.
Nun estudo de Randstad, apúntase que ese avance do 1,8% na comparativa con 2019 suporá o terceiro maior incremento de España, só por detrás de Castela-A Mancha (+14,4%) e a Comunitat Valenciana (+5,5%). De feito, o crecemento galego contrasta co descenso medio do país (-1,8%).
Por provincias, Pontevedra presentará o maior número de contratos, 11.260 firmas; seguida da Coruña, con 9.870; Lugo, con 2.510, e Ourense, con 1.690.
A nivel estatal, a campaña do Nadal xerará 435.000 contratos, 90.000 máis que o ano pasado, pero aínda non alcanzan os niveis prepandemia.
Os sectores do comercio e da loxística verán crecer a contratación, co de hostalería como o que estará á cabeza, multiplicándose por seis respecto de 2020.
O director de Randstad Research, Valentín Bote, explica que, aínda que a contratación será inferior ao de previo á pandemia" en España, "as cifras indican unha tendencia bastante positiva".
